Рубель на арэлях: чаго чакаць беларусам

• Анастасія Лузгіна
• 28.09.2026, 9:37

На курс і далей уплываюць знешнія фактары і геапалітычныя выклікі.

Беларускі рубель заканчвае верасень на фоне працяглай знешняй нявызначанасці. На курс нацыянальнай валюты ўплываюць дынаміка расійскага рубля, сітуацыя на нафтавым рынку і іншыя фактары, пры гэтым у кароткатэрміновай перспектыве чакаецца ўмераная дынаміка беларускага рубля да долара і захаванне больш слабога еўра.

З 21 па 28 верасня 2026 года адбыліся наступныя змены курсаў замежных валют і валютнай карзіны да беларускага рубля:

каштоўнасць валютнай карзіны засталася без змен і склала 0,175 (бел. руб.);

долар ЗША нязначна ўмацаваўся да рубля (+0,14%) і раўняўся 3,0276 (бел. руб. за 1 долар ЗША);

еўра знізіўся на 0,66% і склаў 3,4487 (бел. руб. за 1 еўра);

курс расійскага рубля дэвальваваў на 0,12% і раўняўся 3,5914 (бел. руб. за 100 рас. руб.);

кітайскі юань знізіўся на 0,1% і склаў 4,5145 (бел. руб. за 10 юаняў).

Знешнія фактары вызначаюць дынаміку рубля

На працягу чацвёртага тыдня верасня назіралася нестабільная дынаміка беларускага рубля. Калі яшчэ 22–23 верасня рубель умацоўваўся да долара, то 24–25 верасня адбылося яго аслабленне. 28 верасня Нацыянальны банк зноў павысіў курс рубля да амерыканскай валюты.

На курс нацыянальнай валюты і далей уплываюць знешнія фактары і геапалітычныя выклікі. У значнай ступені гэта адбываецца апасродкавана праз ваганні расійскага рубля. Расійская валюта, у сваю чаргу, моцна залежыць ад сітуацыі ў знешнім гандлі і чаканых паступленняў ад нафтавых кантрактаў. Хоць попыт на замежную валюту ў Расіі застаецца высокім, захаванне высокіх цэн на лістападскія ф'ючэрсныя кантракты на нафту ў выніку працяглага канфлікту на Блізкім Усходзе падтрымлівае рубель і перашкаджае яго паскоранаму аслабленню ў бліжэйшыя месяцы.

На дадзены момант на курс расійскай валюты станоўча ўплывае таксама набліжэнне падатковага перыяду. Экспарцёры больш актыўна прадаюць валюту для аплаты падаткаў, павялічваючы прапанову на валютным рынку.

У сярэднетэрміновай перспектыве курс на зніжэнне

Абноўлены прагноз па развіцці сітуацыі на валютным рынку апублікавала Міністэрства эканамічнага развіцця ў межах прадстаўлення прагнозу сацыяльна-эканамічнага развіцця на 2027 год і на планавы перыяд 2028–2029 гг. Ён дазваляе прааналізаваць чаканую дынаміку курса расійскага рубля ў бліжэйшыя гады. Паводле афіцыйных дадзеных, сярэдні курс расійскага рубля будзе паступова дэвальваваць адносна долара ЗША. Больш паскоранае зніжэнне курсу ў памеры каля 10% прагназуецца ў 2027 годзе.

Сярэднегадавы курс расійскага рубля можа знізіцца з 79,5 рубля за долар ЗША ў 2026 годзе да 87,4 рубля ў 2027 годзе. Затым дэвальвацыя запаволіцца, і ў 2029 годзе сярэдні курс расійскага рубля да долара складзе 96 рублёў. Намінальная дэвальвацыя расійскага рубля павінна адбывацца на фоне зніжэння сярэднегадавых цэн на нафту з $85–86 за барэль у 2026 годзе да $66 за барэль у 2029 годзе. Адначасова прагназуецца скарачэнне памеру дысконту на нафту маркі Urals з $25 за барэль у 2026 годзе да $15 у 2029 годзе.

Намінальная дэвальвацыя расійскага рубля будзе стымуляваць аналагічную дынаміку курса да долара ЗША і беларускага рубля. У той жа час інтэнсіўнасць зніжэння курсу беларускага рубля пры дастатковай прапанове замежнай валюты на ўнутраным валютным рынку можа быць на некалькі працэнтных пунктаў меншая за аслабленне расійскай валюты.

Еўра пад ціскам

Аслабленне еўра да беларускага рубля трэці тыдзень запар фіксуецца на фоне зніжэння курса еўрапейскай валюты да долара. Этаму спрыяюць некалькі фактараў. Па-першае, мінулага тыдня кошт дызельнага паліва ў Еўропе дасягнуў максімальных значэнняў на фоне заявы прэзідэнта ЗША Дональда Трампа аб магчымым прыпыненні экспарту дызпаліва. Гэта пагаршае чаканні інвестараў адносна ўстойлівасці еўрапейскай эканомікі.

Па-другое, ўзмацненне грашова-крэдытнай палітыкі ЗША падтрымлівае прывабнасць амерыканскай валюты для інвестараў. Па-трэцяе, дадатковым аслабляльным фактарам для еўрапейскай валюты сталі заявы Дональда Трампа аб магчымым увядзенні маштабных мытных пошлін на еўрапейскія тавары або поўным спыненні гандлю з Еўрасаюзам у выпадку рэалізацыі праекта па прыняцці Канады ў якасці першага асацыяванага члена ЕС.

Кароткатэрміновы прагноз: у наступны тыдзень (з 28 верасня па 5 кастрычніка) курс беларускага рубля да долара ЗША можа вагацца ў дыяпазоне 3–3,06 рубля за долар ЗША.

Анастасія Лузгіна, «Белсат»