Прызначаныя новыя кіраўнікі МАРТа і Дзяржстандарта

• 28.09.2026, 12:24

Таксама Лукашэнка замяніў шэраг чыноўнікаў рэгіянальнага ўзроўню.

28 верасня Лукашэнка правёў кадравыя перастаноўкі: у спісе на прызначэнні і ўзгадненні было 29 чалавек. У прыватнасці, намеснікам кіраўніка Адміністрацыі стаў начальнік Генштаба Павел Мураўейка. Новыя кіраўнікі з'явіліся таксама ў МАРТ і Дзяржстандарце.

Начальнікам Генштаба і першым намеснікам міністра абароны замест Мураўейкі прызначаны Уладзімір Белы.

Міністрам антыманапольнага рэгулявання і гандлю стаў Аляксандр Якавчыц, які раней працаваў намеснікам міністра сельскай гаспадаркі і харчавання. Ягонай першай намесніцай будзе Таццяна Шаўцова. Першым намеснікам міністра інфармацыі прызначаны Дзяніс Езерскі, а першым намеснікам міністра культуры — Аляксандр Сідарэнка.

У Мінпрыроды першым намеснікам міністра стане Аляксей Стасюкевіч, намеснікам — Аляксей Глаз. Сакратарыят Савета Рэспублікі ўзначаліць Сяргей Шкрэбцій.

Старшынёй Дзяржстандарта прызначаны Дзмітрый Баско, раней — першы намеснік старшыні Камітэта дзяржаўнага кантролю. На яго месца прыйшоў Віктар Селіцкі.

Упаўнаважаным па справах рэлігій і нацыянальнасцяў стаў Алег Дзячэнка, да гэтага — намеснік старшыні пастаяннай камісіі так званай Палаты прадстаўнікоў па міжнародных справах. Беларускі інстытут стратэгічных даследаванняў (БІСД) узначаліў Андрэй Кунцэвіч.

Паслом Беларусі ў Сірыі па сумяшчальніцтве і ў Іарданіі прызначаны Яраслаў Чаркасскі. Узгоднены таксама кандыдатуры трох генеральных консулаў: Дзмітрый Харытончык паедзе ў Казань, Ігар Балатаў — у Навасібірск, Аляксандр Шалімоў — у кітайскі Чунцын.

Генеральным дырэктарам ААТ «Белвторчермет» (Беларускага дзяржаўнага аб’яднання па нарыхтоўцы, перапрацоўцы і пастаўцы лому і адходаў чорных і каляровых металаў) стаў Сяргей Гунько.

Лукашэнка таксама ўзгадніў прызначэнне дзесяці новых кіраўнікоў раёнаў і раённых адміністрацый:

Гарадоцкі райвыканкам узначаліць Ірына Дубавец;

Талачынскі — Віталь Карталёўскі;

Клецкі — Дзмітрый Сасіновіч;

Копыльскі — Іван Дамашэвіч;

Любанскі — Жанна Алішэвіч;

Слуцкі — Віталь Платун;

Старадарожскі — Аляксандр Праташчык;

Клімавіцкі — Аляксандр Анжэнка.

Кіраўніком спраў Мінскага аблвыканкама прызначаны Аляксандр Логвін. У Мінску адміністрацыю Партызанскага раёна ўзначаліць Мікалай Строк, Першамайскага — Аляксандр Драгун.