Nissan запусцілі на фрыцюрным алеі

• 28.09.2026, 14:13

Стары Terrano паказаў нечаканы вынік.

Стары Nissan Terrano паказаў нечаканы вынік у эксперыменце з альтэрнатыўным палівам. Расійская майстэрня Garage 54 праверыла, ці зможа дызельны пазадарожнік нармальна працаваць на звычайным і адпрацаваным сланечнікавым алеі, піша Autoblog (пераклад — сайт Charter97.org).

Спачатку Terrano запраўілі свежым сланечнікавым алеем. Рухавік працаваў без сур'ёзных праблем, пасля чаго эксперыментатары вырашылі выкарыстаць яшчэ больш танны варыянт — алей, на якім раней смажылі бульбу фры і курыцу.

На наступны дзень узнікла праблема: з-за холаду алей згусцеў, і рухавік з цяжкасцю запусціўся. Пасля прагравання свечак напальвання пазадарожнік зноў адправіўся на выпрабаванні.

Розніца паміж дызелем і адпрацаваным алеем аказалася невялікай. У разгоне ад 0 да 80 км/г версія на дызельным паліве паказала вынік 24,08 секунды і апярэдзіла альтэрнатыву прыкладна на 0,3 секунды.

Потым параўналі выдатак. На адным літры дызеля Terrano праехаў 10,7 км, а на выкарыстаным алеі — 10 км. Такім чынам, розніца склала ўсяго 700 метраў.

Аўтары эксперымента, аднак, папярэджваюць, што такі спосаб падыходзіць перадусім старым дызельным маторам з механічным упырскам. Сучасныя рухавікі для такога паліва не прызначаныя з-за яго высокай глейкасці.

Акрамя таго, сталая язда на адпрацаваным алеі можа паскорыць знос паліўнай помпы і фарсунак і прывесці да ўтварэння нагару.