У Мінску назвалі самы прыгожы двор года
- 28.09.2026, 16:25
Як ён выглядае і дзе знаходзіцца.
Штогод у Мінску вызначаюць найлепшы двор, найлепшы пад’езд, самы прыгожы прыдамавы палесаднік. Нярэдка вынікі конкурсу, які праводзіць ЖКГ, выклікаюць пытанні: маўляў, бачылі і прыгажэйшыя. Але ў 2026 годзе пераможцам агляду стаў па-сапраўднаму класны двор. 25 тысяч «квадратаў» ператварылі ў паўнавартасную зону адпачынку для дзяцей усіх узростаў (і нават крыху — для дарослых).
Лепшы мінскі двор знаходзіцца на вуліцы Герасіменкі. Захочаце ўбачыць асабіста — ідзіце ў бок дамоў №29, 33, 41 і 45. Тут паміж шматпавярхоўкамі, дзіцячым садам і музычнай школай прытаіўся «Ангарскі Дызнейленд».
Ён схаваўся ў цені высокіх дрэў, у тым ліку іглічных. Сакрэт у тым, што лепшы двор «прадвосхічае» мясцовы лясапарк. Адсюль увесь гэты зялёны каларыт і вялізныя плошчы.
Добраўпарадкаваннем тэрыторыі займалася ЖКГ Заводскага раёна. Да стварэння ўтульнасці далучылася і «Мінскае лясапаркавае гаспадарства», у вядзенні якога знаходзяцца ўсе мясцовыя ёлкі-ігёлкі. Новае месца для адпачынку атрымала на дзіва жывую, не бюракратычную назву: «Двіж-парк „Тэрыторыя ўсмешак“».
Як удакладняе агенцтва «Мінск-Навіны», першы новы аб’ект, які з’явіўся ў «Двіж-парку», — гэта дзіцячы гульнявы комплекс «Князь Гедзімін». Ён «вырас» з грамадзянскай ініцыятывы: мясцовыя жыхары ў 2025 годзе падалі заяўку, якую ў Мінгарсавеце адабрылі. Згодна з Законам «Аб мясцовым кіраванні і самакіраванні ў Рэспубліцы Беларусь» ініцыятары ўносяць не менш за 10% ад кошту праекта, астатняе пакрываецца з бюджэту.
Уладкаванне комплексу абышлося ў 75 тыс. рублёў, з якіх жыхары аплацілі 7,5 тыс.
Акрамя звыклых дзіцячых «забавак», у двары ўсталявалі тры батуты (дзецям будзе дзе выпраскакаць сваю радасць) і тролей — адзін з найпапулярнейшых атракцыёнаў.
— Для ўладкавання атракцыёна ўважліва падбіралі месца — яно павінна быць з пэўным ухілам. Адштурхнуўся — і паехаў. Прычым «сядзушка» на ўсім працягу паміж апорамі знаходзіцца на адлегласці 40—50 см ад зямлі, — удакладніла намесніца дырэктара па добраўпарадкаванні і санітарным утрыманні ЖКГ Заводскага раёна Алена Каляга. — Тролей так спадабаўся жыхарам, і не толькі дзецям, што да яго ўтвараецца чарга.
Усталявалі ў новым двары-парку і спартыўную пляцоўку з антывандальнымі трэнажорамі. Тут бацькі змогуць знайсці сваіх дзяцей-падлеткаў.
На добраўпарадкаванне такога двара пайшла значная частка лета. А вось 2-е месца ў штогадовым аглядзе-конкурсе заняла дваравая тэрыторыя ў Цэнтральным раёне каля дома №12 на вуліцы Заслаўскай. 3-е месца падзялілі двары ў Кастрычніцкім раёне ў акружэнні дамоў №6/1, 6/2 на вул. Асаналіева і ў Савецкім раёне каля дома №20/1 на вул. Гамарніка.
— З кожным годам конкурс становіцца маштабнейшы, праекты — больш прадуманыя, а геаграфія ўдзельнікаў — шырэйшая, — адзначылі ў МГЖХ.