Пуцін будзе закрываць дзірку ў бюджэце за кошт расійцаў і бізнесу

• 28.09.2026, 19:16

Гіперінфляцыя абясцэніць зберажанні грамадзян РФ.

Адразу пасля парламенцкіх «выбараў» Крэмль пачаў уводзіць новыя падаткі для расійцаў, паралельна рэзка выраслі цэны на тавары. І гэта толькі пачатак. Вайна зрабіла ў дзяржаўным бюджэце РФ дзірку на 7–8 трлн рублёў, закрываць якую няма чым.

Пра гэта паведаміў незалежны расійскі эканаміст Вячаслаў Шыраеў у інтэрв’ю рэсурсу «Можем объяснить».

Паводле ягоных даных, Крэмлю да канца года трэба скараціць дзірку ў бюджэце хоць бы да 5 трлн рублёў.

— Каб атрымаць гэтую лічбу, ім трэба «намаляваць» прыкладна 3–4 трлн рублёў падатковых паступленняў, якіх у іх у прынцыпе быць не можа, — расказаў Шыраеў. Таму, паводле яго слоў, новыя паборы з насельніцтва непазбежныя.

Ён папярэдзіў, што цэны на тавары і паслугі моцна ўзляцяць, паколькі Крэмль будзе спрабаваць хаваць выдаткі ў звычайныя плацяжы.

Эканаміст таксама запэўніў, што расійскі бізнес не пазбегне сумнага лёсу. Варта чакаць новага павышэння падатку на прыбытак, які ў РФ ужо знаходзіцца на ўзроўні 25%.

Вялікая верагоднасць, што Крэмль паспрабуе запусціць руку ў звышдаходы кампаній. Таксама, хутчэй за ўсё, бізнесу давядзецца самому аплачваць сабе абарону ад беспілотнікаў.

У тое, што Крэмль паспрабуе канфіскаваць банкаўскія ўклады расійцаў, Шыраеў не верыць. Ён адзначыў, што адбіраць ужо няма чаго, бо гэтых грошай няма: яны раздадзеныя ў выглядзе крэдытаў. Аднак уклады насельніцтва могуць прымусова канвертаваць у аблігацыі, або гэтыя сродкі проста будуць з’едзеныя інфляцыяй.