Досвед Украіны ўжо выкарыстоўваюць у арміі Фінляндыі

• 28.09.2026, 21:26

Камандуючы Сухапутнымі войскамі наведаў Кіеў.

Камандуючы Сухапутнымі войскамі Фінляндыі, генерал-лейтэнант Пасі Вялімякі наведаў Украіну для ўмацавання супрацоўніцтва паміж узброенымі сіламі дзвюх краін, паведамляе Yle.

Вялімякі знаходзіўся ва Украіне з 20 па 25 верасня. Ён сустрэўся з камандуючым трэцім армейскім корпусам Сухапутных войскаў Украіны і яго падначаленымі. Бакі абмеркавалі аператыўную сітуацыю, змены на полі бою, падрыхтоўку і аснашчэнне войскаў.

- Для мяне было важна сустрэцца з украінскімі камандзірамі фронту і абмеркаваць з імі змены на полі бою, фактары поспеху і выклікі, каб наша дзейнасць правільна ўпісвалася ў бягучыя змены, — заявіў Вялімякі.

Паводле дадзеных Сухапутных войскаў Фінляндыі, досвед Украіны ўжо ўлічваецца пры падрыхтоўцы фінскіх вайскоўцаў. Таксама плануецца пашырыць абмен інструктарамі паміж дзвюма краінамі.

Падчас візіту Вялімякі азнаёміўся з кіраваннем беспілотнымі сістэмамі і выкарыстаннем дронаў для супрацьпаветранай абароны. Украінскі баявы досвед таксама выкарыстоўваецца ў распрацоўках НАТА.

Камандуючы Узброенымі Сіламі Украіны, генерал-маёр Міхаіл Драпаты, уручыў Вялімякі ордэн «За заслугі» II ступені.