У Беларусі колькасць прадпрымальнікаў па-ранейшаму скарачаецца

• 28.09.2026, 22:02

Яны таксама саступаюць рынак буйным гандлёвым сеткам.

У Беларусі працягвае скарачацца колькасць індывідуальных прадпрымальнікаў. На пачатак верасня 2026-га іх налічвалася 198 338, паведамляе Белстат. Гэта на 10,6% менш, чым было годам раней, піша «Зеркало».

Найбольш прыкметна колькасць ІП скарацілася ў арганізацыях, якія занятыя ў сферы інфармацыі і сувязі (-33,7% да верасня 2025-га), а таксама прафесійнай, навуковай і тэхнічнай дзейнасці (-21,2%). За апошні год іх стала больш толькі ў адной галіне — транспартная дзейнасць, складзіраванне, кур’ерская і паштовая дзейнасць (+6,5%).

Калі глядзець па рэгіёнах, больш за ўсё ІП па-ранейшаму налічваецца ў Мінску — чвэрць ад агульнай колькасці (50,3 тыс.), а найменш — у Віцебскай вобласці (амаль 18,5 тыс.). Найбольш прыкметна іх колькасць за апошні год скарацілася ў Мінскай вобласці, Мінску і Гродзенскай вобласці — на 14,9%, 12,9% і 11,3% адпаведна.

Нагадаем, з 2026 года для ІП адменены некаторыя віды дзейнасці, якімі яны могуць займацца.

ІП саступаюць рынак

Рознічны тавараабарот індывідуальных прадпрымальнікаў і фізічных асоб у студзені–жніўні бягучага года склаў 2 млрд 801,6 млн рублёў. Гэта сума на 2,7% меншая ў супастаўных цэнах, чым за аналагічны перыяд 2025-га.

На ІП і фізічных асоб у студзені–жніўні гэтага года прыпадала 3,7% ад усяго рознічнага тавараабароту, астатняе — на арганізацыі. Годам раней гэты паказчык быў на ўзроўні 4,3%.