«Мадзяр»: Чатыры краіны НАТА таемна ствараюць сілы БПЛА

• 28.09.2026, 22:08

Па ўкраінскім узоры.

Чатыры краіны НАТА таемна пачалі стварэнне ўласных сіл беспілотных сістэм па ўкраінскім узоры, хаця сам Альянс застаецца слабым гульцом з-за ўнутраных палітычных разыходжанняў.

Пра гэта ў інтэрв'ю выданню The Telegraph заявіў камандуючы Сіламі беспілотных сістэм Узброеных Сіл Украіны Роберт «Мадзяр» Бровдзі, падкрэсліўшы непадрыхтаванасць Захаду да прамога сутыкнення з Расіяй.

Вайсковы камандуючы падкрэсліў, што ў Альянсе заўсёды будуць існаваць палітычныя фігуры, якія абмяжоўваюць здольнасць блока стрымліваць пагрозы з боку Крамля. На яго думку, прарасійскія ўплывы ў асобных краінах-членах наўпрост шкодзяць абароннаму патэнцыялу Захаду.

- У НАТА заўсёды будуць свае «Орбаны». Сёння гэта Фіцо, які сцвярджае, што НАТА ўжо чатыры гады правакуе Расію на працяг вайны з Украінай. Заўтра гэта будуць нейкія нямецкія або французскія ўплывы, або любы іншы парадак дня, які цяпер цыркулюе ў палітычных колах краін-членаў НАТА, — выказаўся «Мадзяр».

Ён заявіў, што вайна ва Украіне дала Расіі палігон для стварэння адной з самых магутных армій у свеце. Пры гэтым Захад рызыкуе сутыкнуцца з гэтым праціўнікам у стане поўнай непадрыхтаванасці.

«У пачатку вайны ўвесь свет спачатку ўсміхаўся, а потым смяяўся з ідэі, што армія Пуціна — другая па моцы ў свеце. Скажу вам: час для жартаў мінуў. У мяне ёсць рыторычнае пытанне да генералаў НАТА: вы абсалютна ўпэўненыя, што зможаце з гэтым спраўіцца? Адказваць не трэба», — адзначыў камандуючы Сіламі беспілотных сістэм Узброеных Сіл Украіны.

Камандуючы прывёў у прыклад Вялікабрытанію, дзе ў ліпені абвясцілі пра стварэнне працоўнай групы для паскарэння ўкаранення ваенных дронаў. Аднак пасля змены кіраўніцтва ў Лондане гэтыя важныя абаронныя планы былі адкладзены.

- У Вялікабрытаніі змяніўся ўрад, працэсы запаволіліся і змянілі накірунак, і зноў губляецца час, хоць у Вялікабрытаніі ёсць усе магчымасці стаць тут галоўным пастаўшчыком, — расказаў «Мадзяр».

Нягледзячы на гэта, некалькі еўрапейскіх партнёраў ужо прадпрымаюць практычныя крокі на аснове ўкраінскага досведу. Паводле слоў Бровдзі, цяпер чатыры краіны НАТА непублічна ствараюць архітэктуру ўласных беспілотных сістэм. «Я цалкам гэта падтрымліваю. Спачатку зрабі, потым кажы. Іначай ты апынешся ў сітуацыі, як у Вялікабрытаніі», — падсумаваў ён.