У Крамлі нервова адрэагавалі на выступленне Пашыняна па-армянску

• 7.09.2026, 9:48

Пяскоў убачыў у гэтым «сігнал».

У Крамлі выказалі непаразуменне ў сувязі з тым, што прэм’ер-міністр Арменіі Нікол Пашынян выступіў на саміце Шанхайскай арганізацыі супрацоўніцтва па-армянску.

Словы прэс-сакратара Крамля Дзмітрыя Пяскова цытуюць расійскія прапагандысты.

Ён лічыць, што такім чынам Пашынян заявіў пра суверэннасць Арменіі.

«Так, гэта быў сігнал — заявіць пра суверэннасць Арменіі. Чаму толькі пра гэта нельга заявіць па-руску, шчыра кажучы, мы не зразумелі», — сказаў Пяскоў.

У той жа час ён дадаў, што расійскі бок «з павагай» ставіцца да такога выбару кіраўніка армянскага ўрада, калі для яго гэта «настолькі важна» і з’яўляецца «галоўным».

27 жніўня Пашынян заявіў пра наяўнасць падстаў не лічыць Расію стратэгічным партнёрам краіны.