Украінскія дроны ўдарылі па авіябазе РФ у Таганрозе

• 7.09.2026, 12:40

На стаянцы самалётаў узнік пажар.

Украінскія дроны атакавалі ваенны аэрадром у Таганрозе Растоўскай вобласці ў Расійскай Федэрацыі. Пра гэта паведамляе ваенны партал «Милитарный», са спасылкай на даныя маніторынгавага сэрвісу NASA FIRMS.

Адзначаецца, што напад на аэрадром адбыўся ў ноч на 7 верасня 2026 года, пажар зафіксавалі а 02:44 ночы на тэрыторыі стаянкі самалётаў. У паведамленні гаворыцца, што аэрадром размешчаны прыкладна ў 40 км ад дзяржаўнай мяжы Украіны.

«Авіябазай актыўна карыстаецца расійская армія. На яе тэрыторыі размешчаны 325-ы авіярэмонтны завод (в/ч 23213), які займаецца рамонтам транспартных самалётаў і агрэгатаў для Іл-76», — піша выданне.

Таксама адзначаецца, што побач з аэрадромам знаходзіцца вайсковая часць 5-й авіяцыйнай групы.

Аналітыкі партала пішуць, што паўднёвей гэтага аэрадрома размешчаны заводскі аэрадром Таганрогскага авіяцыйнага навукова-тэхнічнага комплексу імя Берыева, на тэрыторыі якога праводзяць рамонт і мадэрнізацыю самалётаў ДРЛВ А-50У, транспартных Іл-76 і патрульных Іл-38. Прадпрыемства таксама ажыццяўляе мадэрнізацыю і абслугоўванне самалётаў замежных заказчыкаў.

Менавіта на самалётах дальняга радыёлакацыйнага выяўлення і кіравання А-50 і А-50У трымаецца расійская СПА.

Губернатар Растоўскай вобласці Юрый Слюсар прызнаў раніцай, што мела месца атака БПЛА, больш за два дзясяткі якіх былі знішчаныя. Паводле яго слоў, інфармацыя пра пацярпелых і разбурэнні нібыта не паступала.