Politico: Найджэл Фарадж плануе прыехаць ва Украіну і даказаць, што «не любіць Пуціна»

• 8.09.2026, 19:40

Лідара партыі Reform UK неаднаразова абвінавачвалі ў сімпатыях да расійскага дыктатара.

Лідар правапапулісцкай партыі Вялікабрытаніі Reform UK Найджэл Фарадж, якога неаднаразова абвінавачвалі ў сімпатыях да расійскага дыктатара Уладзіміра Пуціна, плануе наведаць Украіну.

Пра гэта піша Politico са спасылкай на двух чыноўнікаў партыі Фараджа.

Двое чыноўнікаў паведамілі выданню, што паміж партыяй і украінскімі партнёрамі адбыліся перамовы аб магчымасці візіту.

Апаненты Фараджа часта згадваюць яго каментар, зроблены яшчэ ў 2014 годзе, пра тое, што ён «захапляецца» расійскім дыктатарам як «стратэгам». А праз 10 гадоў ён выклікаў негатыўную рэакцыю падчас агульнанацыянальных выбараў, заявіўшы, што менавіта Захад «справакаваў» уварванне Расіі ва Украіну.

Акрамя таго, летась у Уэльсе арыштавалі лідара мясцовай ячэйкі Reform UK за хабар ад Расіі. Гэта толькі ўзмацніла абвінавачанні на адрас Фараджа ў падтрымцы Пуціна.

Крыніца выдання ў партыі паведаміла, што ведае пра перамовы адносна прыезду Фараджа ва Украіну, але невядома, на якой яны стадыі.

Апытанне, праведзенае More in Common летась, паказвае: хоць усе электаральныя групы ў Вялікабрытаніі пераважнай большасцю падтрымліваюць Украіну, толькі 26% лічаць, што Фарадж прытрымліваецца такой жа пазіцыі. Яшчэ 21% апытаных лічаць, што ён больш сімпатызуе Расіі.

У Reform UK спадзяюцца, што візіт Фараджа ва Украіну дапаможа ў пэўнай ступені развеяць гэтыя ўяўленні.

Як піша Politico, візіт мог бы ў значнай ступені развеяць уражанне пра сімпатыі Фараджа да Пуціна. У той жа час такая паездка можа «раззлаваць нямала нашых сябраў». У кастрычніку ён назваў Пуціна «вельмі дрэнным тыпам» і заявіў, што Вялікабрытанія павінна збіваць расійскія самалёты, якія парушаюць брытанскую паветраную прастору.