У Беларусі пачалі шыць адзенне для цялят

• 8.09.2026, 19:59

На выпадак маразоў.

Адзенне для цялят пачалі шыць на адной з беларускіх фабрык, піша БелТА.

На незвычайную ідэю спецыялістаў падштурхнулі сур’ёзныя маразы зімовага сезона 2025/2026.

Менавіта тады, каб жывёлы не замёрзлі, тэрмінова пашылі першыя партыі папонаў з уцяпляльнікам.

Цялят хочуць апранаць на Антопальскай ватна-прадзільнай фабрыцы. Гэтым разам да пытання падышлі загадзя — яшчэ да наступлення першых маразоў.

«Напярэдадні наступнага сезону халадоў разумеем, што гэта запатрабавана, таму працягнулі працу», — адзначылі на фабрыцы.

Адзенне будзе не простае, а з уцяпляльнікам. Спецыялісты аддаюць перавагу ўласным матэрыялам.

«Можам выкарыстоўваць і іглапрабіўнае палатно, і сінцепон рознай таўшчыні. Калі тэмпературны рэжым да мінус 5°С — ён будзе танчэйшы, для больш моцных маразоў — таўсцейшы», — патлумачылі на фабрыцы.

Верхні пласт шыюць з воданепранікальнага матэрыялу, а для выварату бяруць бавоўняную тканіну.

«Робім так, каб было мякка, не раздражняла скуру цяляці, каб яму было камфортна. Не выкарыстоўваем клеёнчатыя матэрыялы, ад якіх жывёла будзе пацець. Для зручнасці папона робіцца на спецыяльных фіксатарах-зашчолках і рамянях для рэгулявання памеру», — распавялі на прадпрыемстве.

Папоны, як правіла, раяць не ўсім, а навараджаным цялятам, у якіх яшчэ не сфарміраваўся цэнтр тэрмарэгуляцыі ў галаўным мозгу. Гэта актуальна для ўзросту да месяца.

Што да наступнай зімы, на яе даюць вельмі розныя прагнозы. Паводле некаторых крыніц, будучы перыяд будзе мякчэйшы за леташні. Але ў сельскай гаспадарцы не хочуць спадзявацца на авось.

І ўсё ж такі рыхтуюцца да магчымых халадоў.