Нямецкія СМІ: Расея ўцягвае Беларусь у другую «халодную вайну»

• 27.08.2008, 16:13

У сваім камэнтары “Другая халодная вайна” вядучы аглядальнік нямецкага тэлеканалу N-TV Манфрэд Блескін адзначыў, што — прынамсі пасьля ўказу Мядзьведзева аб прызнаньні сувэрэнітэту Абхазіі і Паўднёвай Асэтыі — можна казаць пра канец “стратэгічнага партнэрства” паміж Захадам і Расеяй.

Паводле нямецкага тэлеаглядальніка, цяпер Масква пачне ціснуць з прызнаньнем і на іншыя краіны, уцягваючы іх у гэтую халодную вайну. Размова, найперш, ідзе пра Беларусь, Сырыю, Кубу, Паўночную Карэю, Іран, паведамляе “Радыё Свабода”.

“Гэтая другая халодная вайна, як і многія іншыя гарачыя войны, а таксама першая халодная вайна, пачалася паступова. Масква ўбачыла ў спрэчным з гледзішча міжнароднага права прызнаньні незалежнасьці Косава карт-блянш для ўласных імпэрскіх намераў. Захад праігнараваў рашэньне Рады бясьпекі ААН № 1244, згодна зь якім гэтая правінцыя належыць Сэрбіі як правапераемніцы Фэдэратыўнай Югаславіі. Масква парушыла сувэрэнітэт і цэласнасьць Грузіі”, — піша ў сваім камэнтары Манфрэд Блескін.

Што да пазыцыі іншых дзяржаў СНД, то яна, паводле нямецкага аглядальніка, пакуль няясная. "Большасьць краін-удзельніц Садружнасьці паважалі фактычную незалежнасьць абедзьвюх непрызнаных рэспублік, тым ня менш яны будуць цягнуць з фармальным прызнаньнем. Што да Кітаю, зь якім Расея разам з Казахстанам, Кыргызстанам і Таджыкістанам мае ваеннае супрацоўніцтва у рамках Шанхайскай групы, то ён сам змагаецца з сэпаратысцкім групоўкамі. Тое ж самае тычыцца і Індыі”.

Аднак Расея будзе рабіць усё дзеля прызнаньня “яе зонаў уплыву”, “як гэта ўжо было ў часы першай халоднай вайны”, мяркуе аглядальнік NT-V.