Актывіста Партыі БНФ у 10-ы раз не ўзялі на працу з-за палітыкі

• 15.10.2009, 9:59

Кіраўнік Гарадоцкага аддзялення Партыі БНФ Леанід Аўтухоў у чарговы раз паспрабаваў уладкавацца на працу па накіраванні Цэнтра занятасці.

Аднак дзесятая спроба зноў была безвыніковай, паведамляе «Радыё Свабода».

Леанід Аўтухоў паведаміў, што атрымаў накіраванне ў Гарадоцкі лясгас (Віцебская вобласць), бо там былі вакансіі. У аддзеле кадраў спачатку гэта пацвердзілі, аднак спыталі: «Не ці той вы Аўтухоў, які «бэнээфавец»?» Апазіцыянер пацвердзіў, што з'яўляецца кіраўніком мясцовага аддзялення партыі.

Пасля гэтай заявы актывіста выклікаў дырэктар лясгаса і паведаміў, што вакансіяў ужо няма.

Актывіст апазіцыі заяўляе, што 10 раз на працягу гэтага года спрабаваў уладкавацца на працу толькі афіцыйным шляхам - праз Цэнтр занятасці. Прыкладна столькі ж раз прыходзіў да працадаўцаў сам і па пратэкцыі знаёмых. Адмовы звычайна гучалі адразу пасля таго, як працадаўцы даведваліся, што Леанід Аўтухоў з'яўляецца актывістам апазіцыі.

Аўтухоў страціў працу ў сакавіку 2007 года. Ён працаваў аператарам ачышчальных збудаванняў у Гарадку, але з ім не працягнулі кантракт пасля таго, як ён пачаў адкрыта выказваць свае палітычныя погляды і прымаць удзел у акцыях апазіцыі.