Віцэ-прэм'ер: Беларусь разлічвае на прывілеяванае супрацоўніцтва з Кубай

• 21.05.2009, 17:20

«Беларусь разлічвае быць прывілеяваным эканамічным партнёрам Кубы на доўгатэрміновай аснове», заявіў віцэ-прэм'ер Віктар Бура.

Пра гэта ён паведаміў, выступаючы 21 траўня на адкрыцці дзявятага паседжання беларуска-кубінскай сумеснай камісіі па гандлёва-эканамічным супрацоўніцтве, піша БелаПАН.

Бура адзначыў, што бакі «здаволеныя вынікамі гандлю па выніках 2008 года».

«Разам з тым, неабходна прааналізаваць прычыны заніжэння таваразвароту ў першым квартале гэтага года. Прычым не толькі выявіць прычыны, але і вызначыць комплекс мераў па яго павелічэнні», - адзначыў віцэ-прэм'ер.

Паводле яго словаў, «з улікам існуючых цяжкасцяў фінансава-эканамічнага характару, выкліканых сусветным крызісам, краінам неабходна накіраваць высілкі на распрацоўку новых схемаў фінансавання экспартна-імпартных аперацыяў».

Беларускі бок, сказаў Бура, паінфармуе кубінскі пра свае магчымасці пры падаванні адтэрміновак плацяжоў за беларускую прадукцыю.

Віктар Бура ўзначальвае беларускую частку сумеснай камісіі, намеснік міністра знешняга гандлю і замежных інвестыцыяў Кубы Рыкарда Герэра Бланка — кубінскую.

У межах візіту чальцы кубінскай дэлегацыі правядуць перамовы ў зацікаўленых міністэрствах і ведамствах, наведаюць шэраг беларускіх прадпрыемстваў і арганізацыяў, у тым ліку Менскі трактарны завод, Менскі малочны завод № 1, завод «Менск Крышталь», Рэспубліканскі навукова-практычны цэнтр анкалогіі і медыцынскай радыялогіі ім. Аляксандрава.

Плануецца, што Беларусь і Куба падпішуць міжурадавую дамову аб супрацоўніцтве ў галіне ветэрынарыі.