Рашэнне Вярхоўнага суда па пазове «Нашай Вясны» будзе вынесенае 12 жніўня

• 11.08.2009, 12:59

11 жніўня пракурор папрасіла Вярхоўны суд адмовіць у задавальненні скаргі заснавальнікаў аб'яднання.

Як паведаміў БелаПАН адзін з заснавальнікаў арганізацыі праваабаронца Валянцін Стэфановіч, рашэнне Вярхоўнага суда Беларусі па скарзе заснавальнікаў грамадскай праваабарончай арганізацыі «Наша Вясна» на адмову ў рэгістрацыі будзе абвешчанае 12 жніўня.

11 жніўня ў Вярхоўным судзе адбыліся спрэчкі бакоў і выступіла пракурор Кастакава. Яна папрасіла Вярхоўны суд адмовіць у задавальненні скаргі заснавальнікаў аб'яднання.

«Яе меркаванне аб адмове ў задавальненні скаргі засноўваецца на тым, што чатыры чалавекі падалі нібыта недакладныя звесткі аб сваіх адрасах і месцы працы, — сказаў Стэфановіч. — У прыватнасці, адзін чалавек напісаў, што працуе выхавальнікам «у секцыі», у той час калі трэба было напісаць «у групе». Яшчэ адна заснавальніца напісала скарочаную назву навучальнай установы, у якой яна працуе; на думку Мінюста, трэба было паказваць поўную. І такія дробязі могуць стаць прычынамі адмовы ў задавальненні скаргі».

Па словах Стэфановіча, пракурор заявіла, што прэтэнзіі Мінюста да назвы арганізацыі, яе статута і да таго, што заснавальнікі «Нашай Вясны» прыцягваліся да адміністрацыйнай адказнасці, не з'яўляюцца прычынамі для адмовы ў рэгістрацыі.

На іх думку, «рашэнне па скарзе відавочнае».

«Хутчэй за ўсё, пасля выступлення пракурора нам адмовяць у рэгістрацыі», — выказаў меркаванне Стэфановіч.

Мінюст ужо тройчы адмаўляў праваабарончаму аб'яднанню ў рэгістрацыі.