Прычыны смерці нямецкага пілота ўсталяваныя, але не агалошваюцца

• 11.08.2010, 13:10

Сваякам нямецкага пілота Гюнтэра Цымера, які разбіўся пад Менскам, выдадзена медыцынскае пасведчанне аб яго смерці.

Пра гэта паведамілі БелаПАН ва ўпраўленні па Менскай вобласці Дзяржаўнай службы медыцынскіх судовых экспертызаў.

З пасведчаннем азнаёмленыя прадстаўнікі Беларускай ваеннай пракуратуры і амбасады Германіі ў Менску.

Па словах суразмоўцы агенцтва, усё, што неабходна было зрабіць судмедэкспертамі ў інтарэсах расследавання на першапачатковым этапе, зроблена аператыўна. Пры гэтым экспертызы будуць працягнутыя, каб адказаць на ўсе пытанні, пастаўленыя следствам.

У выдадзеным сваякам дакуменце пазначаныя прычыны смерці Гюнтэра Цымера, аднак назваць іх суразмоўца агенцтва адмовіўся.

Такая ж пазіцыя і ў Беларускай ваеннай пракуратуры, дзе заявілі, што пакуль не скончыцца расследаванне, ніякай інфармацыі па справе аб катастрофе на аэрадроме Цэнтральнага аэраклуба ДТСААФ пададзена не будзе.