Фігуранта «справы 19 снежня» не выпусцілі з Беларусі

• 23.09.2011, 13:08

Лідэра арганізацыі Аб'яднанай грамадзянскай партыі «Маладыя дэмакраты» Алега Корбана 23 верасня высадзілі з цягніка на беларуска-літоўскай мяжы.

Як паведаміў Корбан БелаПАН, ён накіроўваўся на канфэрэнцыю ў Вільню.

Свае дзеянні памежнікі матывавалі тым, што лідэр «Маладых дэмакратаў» знаходзіцца ў спісе невыязных і крымінальна караецца.

Між тым, яшчэ ў жніўні Корбан атрымаў афіцыйнае паведамленне, што крымінальная справа ў сувязі падзеямі 19 снежня 2010 года ў дачыненні да яго спыненая і ён можа пакідаць межы Беларусі.

На дадзены момант актывіст знаходзіцца на памежнай станцыі Гудагай. «Зараз я спрабую звязацца са следчымі, каб яны паведамілі памежнікам, што ніякага крымінальнага пераследу ў дачыненні да мяне няма», - паведамілі Корбан.

Разам з тым, па словах суразмоўцы, памежнікі паставілі штамп у ягоным пашпарце аб забароне выезду. Акрамя гэтага, яны абшукалі ягоную сумку, прагледзелі змесціва ноўтбука.