Раённая газета палохае сваіх чытачоў «жахамі» жыцця ў Еўразвязе
- 22.10.2012, 17:25
Улады Ганцавіцкага раёна, які лічыцца лідэрам па беспрацоўі не толькі на Брэстчыне, але і ў цэлым па Беларусі, вырашылі падключыць сваю дзяржаўную прэсу, каб даць адказ «нядобразычліўцам».
Як паведамляе карэспандэнт charter97.org, на сённяшні дзень афіцыйна ў аддзеле па працы і занятасці насельніцтва Ганцавіцкага раёна беспрацоўнымі лічацца 138 чалавек. Лічба невялікая, пры тым што ў раёне пражывае 29,8 тыс чалавек, з якіх амаль палова - у саміх Ганцавічах. Аднак любы мясцовы жыхар вам пацвердзіць: для таго, каб знайсці годна аплачваную працу, трэба ехаць за межы раёна і нават краіны. Практычна ў любой сям'і можна знайсці таго, хто хоць бы аднойчы на працяглы тэрмін пакідаў родных і адпраўляўся на заробкі.
«Вертыкаль» вельмі хваравіта ўспрымае любую згадку пра тое, што ў Ганцавіцкім раёне ёсць сур'ёзныя праблемы з працаўладкаваннем. Каб непанадна было незалежнай прэсе «ачарняць» рэчаіснасць, журналістам мясцовай «раёнкі» быў дадзены наказ падрыхтаваць годны адказ. Што з гэтага атрымалася, можна меркаваць па публікацыі «Добра там, дзе нас няма?» у газеце «Савецкае Палессе».
Аўтар артыкула Кацярына Яцушкевіч зрабіла адразу некалькі парадаксальных для жыхароў Ганцавіцкага раёна высноў. Аказваецца, што яе землякам не варта скардзіцца на лёс: «Было б толькі жаданне працаваць годна, а яго як раз такі і няма. Мы самі часам не хочам зарабляць грошы, спадзеючыся, што манна нябесная зваліцца нам на галаву, а гэта і толькі ў казках бывае». Жыхароў раёна, якія не жадаюць працаваць, журналістка дзяржвыдання пераконвае, што сітуацыя на прадпрыемствах з кожным днём усё паляпшаецца і сярэдняя зарплата ў асобных арганізацыях ужо перавышае тры мільёны рублёў.
Наступным аб'ектам крытыкі супрацоўніцы «Савецкага Палесся» сталі мясцовыя прадпрымальнікі. Маўляў, атрымаўшы шматлікія прэферэнцыі і льготы ад дзяржавы (у тым ліку прадугледжаныя дэкрэтам Аляксандра Лукашэнкі), прадстаўнікі малога бізнэсу самі ж гэту дзяржаву падманваюць, выплочваючы заработную плату сваім супрацоўнікам у канвертах. «У выніку пакутуюць звычайныя людзі, якія пры выхадзе на заслужаны адпачынак асуджаныя атрымліваць мізэрныя пенсіі, так як іх працадаўцы не выплочвалі неабходныя страхавыя і іншыя ўзносы. А ў тых жа Злучаных Штатах Амерыкі за нявыплату падаткаў або ўтойванне атрыманага прыбытку пагражае крымінальная адказнасць», - праяўляе інфармаванасць Кацярына Яцушкевіч.
Не лічыць дарэчнымі журналістка «раёнкі» і скаргі жыхароў Ганцавіцкага раёна на тое, што пабудаваць або купіць кватэру зараз проста нерэальна. Папракнуўшы землякоў, што «трэба нарэшце навучыцца жыць па сродках», аўтар артыкула падрабязна апісвае, што «не так усё вясёлкава і спакойна ў Еўразвязе, куды актыўна заклікаюць «дэмакраты», абяцаючы беларусам райскія шаты: маўляў, пад крылом Захаду жылося б нам нашмат лепш ». Па запэўненнях ганцавіцкай журналісткі, пабудаваць уласнае жыллё ў Еўразвязе - доля толькі багатых, за паслугі ЖКГ бедным еўрапейцам прыходзіцца плаціць спаўна, «а ў Чэхіі, ды і ў іншых краінах Еўропы, медыцына платная». Не была забытая ў публікацыі і Грэцыя, дзе ўлады, па версіі аўтара, не хочуць клапаціцца пра сваіх грамадзян.
Сканчваецца артыкул заклікам «быць гаспадаром у сваім доме - чыстым, утульным і няхай пакуль яшчэ не такім багатым, як хацелася б, чым парабкам у чужым палацы». Вось толькі слухаць гэтыя пастулаты самім жыхарам Ганцавіцкага раёна, якім ніяк не зарабіць на годнае існаванне ў родных месцах, ужо надакучыла.