Турэмшчык браў хабар аўтамабілямі

• 19.04.2012, 15:15

Крымінальная справа распачатая ў дачыненні да намесніка начальніка адной з калоній Гомельскай вобласці.

Следчым камітэтам ўзбуджаная і расследуецца крымінальная справа ў дачыненні да намесніка начальніка ІЧ-20 Упраўлення Дэпартамента выканання пакаранняў МУС па Гомельскай вобласці, паведамілі карэспандэнту БелТА ў аддзеле інфармацыі і сувязяў з грамадскасцю Следчага камітэта Беларусі.

«Падчас аператыўных мерапрыемстваў, праведзеных УКДБ па Гомельскай вобласці, усталявана, што падпалкоўнік унутранай службы за спрыяльнае вырашэнне пытанняў аб паляпшэнні ўмоваў адбывання пакарання для некаторых асуджаных атрымаў незаконнае ўзнагароджанне ў выглядзе аўтатранспартнага сродку», - растлумачылі ў камітэце.

Зараз праводзіцца комплекс дзеянняў па дакументаванні і ўсталяванні ўсіх акалічнасцяў супрацьпраўнай дзейнасці абвінавачанага. У дачыненні да яго абраная мера стрымання ў выглядзе заключэння пад варту. Абвінавачванне прад'яўленае па ч.1 арт.14, ч.3 арт.430 (замах на атрыманне хабару ў асабліва буйным памеры) КК Беларусі.