Пракуратура возьмецца за «чалнакоў» з іншамаркамі

• 21.06.2012, 15:27

Прыбыткі ад нелегальнага гандлю ў памежнай зоне прыйдзецца дэклараваць.

Пра гэта на прэс-канферэнцыі заявіў пракурор Гродзенскай вобласці Віктар Марозаў, паведамляе «Вячэрні Гродна». Шляхам выканання няхітрых арыфметычных дзеянняў у пракуратуры падлічылі, што ў бюджэт не прыносяць ніякага прыбытку каля 80 тыс. жыхароў Гродзенскай вобласці, якія знаходзяцца ў працаздольным узросце.

«Частка з іх маюць асабнякі і іншамаркі, іхнія дзеці наведваюць школы, яны самі карыстаюцца медыцынскай дапамогай, пры гэтым не выплачваюць ні капейкі ў дзяржаўную казну», - падкрэсліў Віктар Марозаў.

Па ініцыятыве пракуратуры такіх грамадзянаў запросяць у падатковую інспекцыю, каб яны задэкларавалі прыбыткі.

Зараз падатковая ўжо «ўзялася» за продаж дарагіх спіртных напояў (віскі, марціні без акцызных марак) праз Інтэрнэт. Алкаголь набываецца ў крамах бяспошліннага гандлю, аднак пры кантрольных закупках, якія ажыццяўляюцца праз гродзенскія сайты і форумы, супрацоўнікі падатковых органаў выяўляюць парушэнні.

Паводле звестак упраўлення кантролю падакцызных тавараў інспекцыі МПЗ па Гродзенскай вобласці, за 4 месяцы з ценявога абароту канфіскавана падакцызнай прадукцыі на 889,6 млн рублёў, у тым ліку 304 літры алкаголю на 16,2 млн, 293,2 тыс. пачкаў цыгарэт, дызельнае паліва , машынныя маслы і нават піва. У прыбытак бюджэту звернута тавараў на 1,2 млрд рублёў.