«Палатачнікі» зноў засталіся за бортам Еўранэста
- 13.05.2013, 14:33
Прадстаўляць Беларусь на пленарнай сесіі Парламенцкай асамблеі «Усходняга партнёрства» будзе апазіцыя.
Як паведаміў сайту charter97.org сустаршыня аргкамітэта па стварэнні партыі «Беларуская хрысціянская дэмакратыя» Віталь Рымашэўскі, ад Беларусі на трэцюю пленарную сесію Парламенцкай асамблеі «Усходняга партнёрства» (Еўранэст) запрошаныя прадстаўнікі апазіцыйных партый і арганізацый.
Сесія пройдзе 28-29 траўня ў Бруселі. Запрашэнне атрымалі Партыя БНФ, Аб'яднаная грамадзянская партыя, Беларуская партыя левых «Справядлівы свет», рух «За Свабоду», кампанія «Гавары праўду!» і аргкамітэт па стварэнні партыі «Беларуская хрысціянская дэмакратыя».
«Беларускія ўлады ўвесь час настойваюць на тым, каб нашу краіну ў Еўранесце прадстаўлялі «дэпутаты». Усе астатнія краіны-удзельніцы «Усходняга партнёрства» прадстаўленыя там менавіта на ўзроўні нацыянальных парламентаў. Аднак да правядзення ў Беларусі свабодных выбараў такое немагчыма. У гэтым прадстаўнікі беларускай апазіцыі маюць адзіную пазіцыю. Нягледзячы на намаганні лабістаў Лукашэнкі, таксама лічаць і ў Еўрапейскім парламенце. Наколькі мне вядома, на трэцюю пленарную сесію Парламенцкай асамблеі Усходняга партнёрства «палатачнікаў» не запрасілі», - сказаў Віталь Рымашэўскі.
Палітык адзначыў, што на сустрэчы будуць падымацца не толькі тэхнічныя пытанні, якія датычацца ўзаемадзеяння Беларусі і Еўрапейскага Звяза ў рамках «Усходняга партнёрства. Таксама будзе абмяркоўвацца сітуацыя ў нашай краіне, становішча палітвязняў і магчымасці, якія могуць быць зробленыя з боку ЕЗ для спрашчэння візавага рэжыму з Беларуссю.
Еўранэст - гэта парламенцкі кампанент ініцыятывы ЕЗ «Усходняе партнёрства», які пачаў працу ў 2011 годзе. У сесіях Парламенцкай Асамблеі Еўранэст удзельнічаюць дэпутаты Еўрапейскага Парламента і пяці краін-удзельніц «Усходняга партнёрства» - Азербайджана, Арменіі, Грузіі, Малдовы і Украіны. «Дэпутатаў» беларускага «парламента» было вырашана не запрашаць з-за таго, што «парламенцкія выбары» былі сфальсіфікаваныя.