Імпартазамяшчэнне па-беларуску: «мацарэла» і «рыкота» з Турава

• 13.06.2013, 12:53

Беларусаў плануюць накарміць айчыннай версіяй італьянскіх сыроў.

На Тураўскім малочным камбінаце пачалі вырабляць сыр па італьянскай тэхналогіі.

Паведамляецца, што прадукцыя паспяхова прайшла лабараторныя даследаванні. Першыя партыі паўцвёрдага сыру «Мацарэла піца» і мяккага «Мацарэла» ўжо адпраўленыя на прылаўкі крам Гомельшчыны. Сёння сутачны аб'ём перапрацоўкі сыравіны, а яго на тураўскае прадпрыемства пастаўляе ААТ «Тураўшчына», складае 32 тоны. А да канца года вытворцы плануюць нарасціць аб'ём перапрацоўкі да 50 тон, піша «Рэспубліка».

Да канца года прадпрыемства плануе выпускаць каля 700 т гатовай прадукцыі ў месяц. Гэта такія сыры, як мацарэла ў заліўцы, мацарэла паўцвёрдая, рыкота, маскарпоне, свежыя і вэнджаныя сыры скармоца, правола, правалета, сметанковы сыр.

Прадпрыемства арыентаванае на тое, каб зрабіць свежыя сыры даступнымі для спажыўца. Як з пункту гледжання прадстаўленасці ў гандлёвых кропках, так і з пункту гледжання кошту. Напрыклад, упакоўка сыру мацарела ў заліўцы каштуе 12-18 тыс. рублёў (у залежнасці ад вагі), а слоічак сыру рыкота - 11-15 тыс.

Прадукцыя Тураўскага малочнага камбіната будзе рэалізоўвацца таксама ў Расеі і Украіне.

Нагадаем, беларускія вытворцы таксама наладзілі выпуск сыроў «Гаўда», «Асіага» і «Маасдам».