Стала вядома, калі будзе дзейнічаць абноўлены дэкрэт «аб дармаедах»

• 21.12.2017, 15:28

Улады вызначаць пералік паслуг, кошт якіх «дармаеды» будуць абавязаныя кампенсаваць напоўніцу.

Абноўлены дэкрэт №3 «Аб папярэджанні сацыяльнага ўтрыманства» пачне дзейнічаць у поўным аб'ёме з 1 студзеня 2019 года. Як паведамляе БелТА, аб гэтым сёння па выніках нарады ў Лукашэнкі паведаміў журналістам віцэ-прэм'ер Васіль Жарко.

«Самы важны падыход - гэта стымуляванне занятасці. Каб максімальна стварыць умовы для стоадсоткавай занятасці грамадзян, якія павінны працаваць адпаведна сваім магчымасцям», - сказаў віцэ-прэм'ер.

Са слоў Васіля Жарко, урад вызначыць адпаведныя крытэрыі і пералік паслуг, кошт якіх тыя, хто падпадзе пад нормы абноўленага дэкрэта, будзе абавязаны кампенсаваць у поўным аб'ёме.