Tut.by: Сілавікі затрымалі гендырэктара буйнога вайсковага прадпрыемства
- 1.02.2019, 21:40
Гендырэктара «БелОМА» Вячаслава Бурскага затрымалі на мінулым тыдні.
У Менску на мінулым тыдні затрымалі генеральнага дырэктара холдынгу «БелОМА» Вячаслава Бурскага. Пра гэта tut.by распавялі дзве інфармаваныя крыніцы.
У прыёмнай Бурскага не змаглі ні пацвердзіць, ні зняпраўдзіць інфармацыю аб затрыманні гендырэктара. Там толькі сказалі, што цяпер выканаўцам абавязку кіраўніка холдынгу з'яўляецца Аляксандр Мароз, першы намеснік гендырэктара - дырэктар эканомікі і фінансаў і сябра савета Рэспублікі.
У Мінпраме, у ведамасным падначаленні якога знаходзіцца «БелОМА», таксама не сталі каментаваць «пагалоскі і размовы» аб затрыманні Вячаслава Бурскага. Разам з тым там адзначылі, што праца ў холдынгу «БелОМА» вядзецца «ва ўстаноўленым парадку». «Назіральны савет прыняў рашэнне аб прызначэнні Мароза выканаўцам абавязку гендырэктара. У прынцыпе, гэта не новая для яго функцыя. На працягу года ён ужо быў «в.а.» у сілу хвароб, камандзіровак Бурскага», - сказалі ў Мінпраме, але не назвалі прычыну цяперашняга кадравага рашэння. Ці магчыма вяртанне Вячаслава Бурскага на пасаду генеральнага дырэктара холдынгу «БелОМА»? «Пасада [знаходзіцца] у кадравым рэестры прэзідэнта. Адпаведныя рашэнні публікуюцца», - адказалі ў Мінпраме.
На працягу двух дзён журналістам не ўдалося атрымаць каментар у СК і КДБ з нагоды затрыманняў у «БелОМА».
Доктар тэхнічных навук, прафесар Вячаслаў Бурскі ўзначаліў «БелОМА» ў 1992 годзе. Але кар'еру пачаў яшчэ ў 1970-м звычайным інжынерам, потым 14 гадоў прапрацаваў галоўным тэхнолагам і галоўным інжынерам. Бурскі ўзнагароджаны ордэнамі «Знак Пашаны», Айчыны II і III ступені.
ААТ «ММЗ імя С.І.Вавілава - кіруючая кампанія холдынгу «БелОМА» спецыялізуецца на распрацоўцы і выпуску оптыка-электронных, лазерных і оптыка-механічных прылад, у тым ліку двайнога прызначэння, аўтамабільных кампанентаў для велікагрузных аўтамабіляў, індывідуальных прыбораў уліку газу, прамысловых свяцільнікаў, бытавой тэхнікі, тавараў народнага спажывання. У склад холдынгу «БелОМА» акрамя Менскага механічнага завода імя С.І.Вавілава ўваходзяць вілейскі завод «Зеніт», рагачоўскі «Дыяпраектар», жлобінскі «Святло», НТЦ «ЛЭМТ», завод «Оптык».