«Паеду ў самыя маразы, каб усё сумленна было»
- 12.01.2022, 15:52
Велападарожнік з Гомеля сёння адпраўляецца скараць расейскую Поўнач.
Памятаеце вядомага гомельскага велападарожніка Сяргея Рабко? Таго самага, які за чатыры гады праехаў на сваім веласіпедзе 100 тысяч кіламетраў па трасах рэспектабельнай Еўропы і самых экзатычных краін Усходу і Азіі. Вярнуўшыся дадому з летняга падарожжа, Сяргей заявіў: «Наступны маршрут будзе самым складаным і небяспечным з усіх, якія ў мяне былі». Гэтым разам дзяцюк надумаў адправіцца на поўнач - у Варкуту. Сёння Сяргей Рабко рушыў у дарогу, пішуць «Сильные новости».
- 100 тысяч кіламетраў, якія я ўжо праехаў, былі першым і, лічу, лёгкім этапам маіх прыгод, - кажа Сяргей. - Падарожжам на Поўнач адкрываецца другі этап. Тут будуць самыя рызыкоўныя і адчайныя прыгоды: расейская Поўнач, Чукотка, Далёкі Усход, пустыні, горы...
Падкрэсліваецца ў дарогу Сяргей вырашыў у сярэдзіне студзеня: «Каб усё было сумленна - у самыя маразы!»
Як не адгаворвалі хлопца падпісчыкі ягонага падарожнага блога адмовіцца ад рызыкоўнага маршруту, Сяргей заставаўся непахісным: «Адсвяткую Новы год дома, таму што мала што можа здарыцца, і ў дарогу. А там - будзь што будзе!»
У дарогу Сяргей падрыхтаваў спальнік на -40°С, аднаслаёвы намёт, тэрмас, ліхтар, акуляры, грэлку для рук, абзавёўся курткай-пухавіком і чаравікамі. А ў яго вело-табуне з'явіўся пяты конь: фэт-байк — ровар на максімальна шырокіх пакрышках, каб можна было праехаць зімнік.
Ні рацыі, ні печкі, ні нават помпы Сяргей з сабой не бярэ:
- Лепш больш ежы вазьму. А то чытаў пра сола-вандраванні італійцаў і гішпанцаў па падобных маршрутах, дык яны столькі рыштунку набіраюць, як быццам гэта экспедыцыя на Месяц.
Дарэчы, паўночная экспедыцыя Сяргея будзе ў поўным сэнсе сола. Першапачаткова ён планаваў узяць з сабой спадарожніка - сабаку Шарыка, улюбёнца ўсіх, хто сочыць за ягонымі падарожжамі. Сяргей ужо шукаў для яго прычэп, «абутак» на лапы. Але незадоўга да дня Х усё ж падумаў, што Шарык будзе чакаць яго дома:
- Асцерагаюся, што на такім маршруце Шар можа захварэць ці яшчэ горш. Вельмі баюся яго страціць!
«І ты заставайся! Пашкадуй сябе!» — узарваліся каментарамі падпісчыкі, калі Сяргей паведаміў аб сваёй задуме ў сацсетках.
- Дзіўныя людзі, - шчыра дзівіцца Сяргей. - Я ўжо год пра гэта падарожжа мару!
Застаецца толькі зычыць Сяргею Рабко шчаслівага шляху.