Трамп адмовіў Орбану ў вызваленні ад санкцый супраць расійскай нафты

• 31.10.2025, 21:52

У лістападзе прэзідэнт ЗША і прэм'ер-міністр Венгрыі сустрэнуцца ў Вашынгтоне.

Прэзідэнт ЗША Дональд Трамп адмовіўся вызваліць Венгрыю ад санкцый супраць расійскай нафты, пра што яго прасіў венгерскі прэм'ер Віктар Орбан.

Як паведамляе РБК-Украіна, пра гэта Трамп заявіў падчас зносін з журналістамі на борце свайго самалёта.

Адказваючы на пытанне адносна просьбы Орбана, Трамп заявіў, што не пагадзіўся прадаставіць Венгрыі выключэнне з-пад санкцый супраць расійскіх нафтавых кампаній.

- Прэм'ер-міністр Венгрыі Орбан папрасіў аб выключэнні з санкцый супраць Расіі, але я не прадаставіў Орбану вызваленне, - сказаў прэзідэнт ЗША.

Нагадаем, прэм'ер-міністр Венгрыі Віктар Орбан сустрэнецца з прэзідэнтам ЗША Дональдам Трампам у Вашынгтоне 7 лістапада.

Паводле звестак крыніц, галоўнай тэмай абмеркаванняў можа стаць спыненне закупкі расійскай нафты Будапештам.

Еўрасаюз і ЗША спрабуюць прымусіць Венгрыю спыніць набываць расійскія энергарэсурсы. Венгерскі прарасійскі ўрад у адказ заяўляе, што краіна, маўляў, не можа цалкам адмовіцца ад расійскай нафты.