Зяленскі: РФ нанесла адзін з самых магутных удараў па ўкраінскай энергетыцы

• 17.10.2026, 13:30

Былі атакаваныя больш як 15 важных аб’ектаў электрагенерацыі і электраперадачы.

Прэзідэнт Украіны Уладзімір Зяленскі заявіў пра нанясенне аднаго з найбуйнейшых за апошні час удараў па энергетычнай інфраструктуры краіны.

«Напярэдадні расіяне нанеслі адзін з самых магутных удараў па ўкраінскай энергетыцы: былі атакаваныя больш як 15 важных аб’ектаў электрагенерацыі і электраперадачы ў розных рэгіёнах Украіны», — напісаў Зяленскі ў Telegram-канале.

Прэзідэнт Украіны адзначыў, што аднаўленчыя работы працягваюцца з прыцягненнем усіх неабходных службаў і наяўных рэсурсаў украінскіх энергетычных кампаній.

«Найбольш складаная сітуацыя склалася ў Луцку, Роўне, Жытоміры, Вінніцы, Шэпетаўцы, Слаўуце і Нетышыне. Удары таксама былі нанесены па энергетыцы Харкаўскай, Кіеўскай, Дняпрапятроўскай і іншых абласцей. Расіяне маштабавалі сваю антыэнергетычную аперацыю і спрабуюць максімальна выснажыць нашы рэзервы і аднаўленчыя магчымасці», — сказаў ён.

Зяленскі ўдакладніў, што з 19:00 папярэдняга дня да 07:00 раніцы расійскія войскі прымянілі супраць украінскіх гарадоў і энергетычнай інфраструктуры больш за 320 беспілотнікаў, уключаючы рэактыўныя мадыфікацыі, а таксама блукаючыя боепрыпасы, крылатыя і балістычныя ракеты.

Па яго словах, нягледзячы на перахоп значнай часткі паветраных мэт, маштабнасць і бесперапыннасць расійскіх удараў па энергетыцы прыводзяць да сур’ёзных наступстваў.