Расія вяртаецца да сэнсу свайго існавання

• Аляксандр Нявзораў
• 17.10.2026, 20:47

Усё шырэй усміхаюцца «мошчы» Малюты Скуратава і Лаўрэнція Берыі.

Рэпрэсіўны апарат Расіі, як высветлілася, — у ідэальным стане. У 90-я гэтую мясарубку не зламалі, а проста паклалі ў чахол «да лепшых часоў».

Усе гэтыя гады чэкісты яе ласкалі і змазвалі, ведаючы, што «вельмі хутка спатрэбіцца».

Яны мелі рацыю. Гэтая мясарубка — найважнейшая частка рускай дзяржаўнасці. Без яе ніякай «Расіі» няма і быць не можа. Яна — аснова асноў. Прычына прычын.

Гэтая мясарубка — «Каўчэг Запавету» рускага народа. Вечная святыня. Усякія «Тройцы» ёй «за півам бегаюць».

І гэта справядліва, бо нідзе больш няма такога дасканалага механізму пераўтварэння насельніцтва ў фарш.

Народзец, прапушчаны праз яе, вылазіць не толькі акуратнымі, але і вельмі паслухмянымі каўбаскамі.

Патроху здымаць чахол з мясарубкі пачалі яшчэ гадоў дваццаць таму. (Поўнасцю здзёрлі ў 22-м годзе).

Сёння яна працуе на дваццатую частку магутнасці, але абароты нарастаюць штодня.

Усё шырэй лыбяцца нетленныя мошчы святога Малюты (Скуратава) і праведнага Лаўрэнція (Берыі). Фелікс вывучае маршрут вяртання на Лубянку і размінае бронзавыя ногі.

Ззяюць жывыя і мёртвыя чэкісты: «жыццё наладжваецца».

Ніякіх інструкцый да мясарубкі не трэба. Рукі ФСБ усё «памятаюць».

Вядома, не без «прагрэсу». Пашыраны асартымент як фізічных, так і маральных катаванняў: супрацоўнікі асвойваюць электрычнасць, сухі лёд, кіслотныя клізмы.

Асобная радасць — сацсеткі. Яны доўга былі без нагляду, а грамадзяне — легкадумныя.

Сёння сеткі вывучаюць тысячы спецоў, раскапваючы мінулае і вяртаючы выдаленае.

Усе працуюць захоплена. Разумеюць: Расія вяртаецца да сэнсу свайго існавання. Лік палітычных спраў пайшоў на дзясяткі тысяч.

Матэматыка Сямёна Красоткіна за тры «зорачкі» да нейкага паста ў «Тэлеграме» доўга катавалі, потым, на каленях, прымушалі спяваць песню «Маці-зямля».

У выніку — уляпілі 275 КК (пажыццёвае).

Грабуць дзяцей, іх мам і дзядоў. Паварак і артыстак, пісьменнікаў і акрабатаў.

Мясарубка прагаладалася.

Аляксандр Нявзораў, «Тэлеграм»