Мінчанка ўдарыла мужа нажом у жывот, калі той выліваў яе шампанскае
- 18.10.2026, 9:34
Усвядоміўшы, што нарабіла, жанчына пачала аказваць першую дапамогу.
Мінчук у разгар канфлікту выліў шампанскае сваёй жонкі, за што атрымаў удар нажом у жывот. Узбуджаную ў дачыненні да жанчыны крымінальную справу ўжо накіравалі ў суд, паведаміла дзяржагенцтва «Мінск-Навіны».
Канфлікт паміж сужэнцамі адбыўся ў здымнай кватэры на вул. Акадэміка Карскага. Аднойчы 39-гадовай мінчанцы захацелася выпіць, і муж схадзіў у краму — купіў ёй дзве бутэлькі шампанскага, а сабе — піва. Пара сядзела на кухні, выпівала і размаўляла.
Заўважыўшы, што муж захмялеў, жанчына зрабіла яму заўвагу — бо яму яшчэ трэба было дыстанцыйна папрацаваць. Аднак той працягваў піць піва. Гэта раззлавала мінчанку — яна скінула келіх са стала, і той разбіўся.
У адказ муж узяў недапітую бутэльку шампанскага і пачаў выліваць яе змесціва ў ракавіну. У гэты момант жонка схапіла кухонны нож і ўдарыла ім мужчыну ў жывот.
Усвядоміўшы, што нарабіла, яна пачала аказваць першую дапамогу. Стан мужа толькі пагаршаўся, таму яна выклікала хуткую, папярэдне памыўшы нож і прыбраўшы ў кватэры. Прыбылым медыкам і міліцыянтам сужэнцы заявілі, што мужчыну нібыта паранілі незнаёмцы, калі той вяртаўся з крамы.
Пазней праўда выйшла на паверхню, і ў дачыненні да жанчыны ўзбудзілі крымінальную справу. Згодна з высновай экспертаў, яе мужу было прычынена цяжкае цялеснае пашкоджанне па прыкмеце небяспекі для жыцця.
«У абвінавачанай вышэйшая адукацыя, яна замужам, ад першага шлюбу мае двух дзяцей, якія пражываюць са сваім бацькам. Грамадзянка афіцыйна нідзе не працаўладкаваная, раней да крымінальнай адказнасці не прыцягвалася.
Ёй прад'яўлена абвінавачанне ў здзяйсненні злачынства, прадугледжанага ч. 1 арт. 147 КК (намернае прычыненне цяжкага цялеснага пашкоджання, гэта значыць пашкоджання, небяспечнага для жыцця). Віну грамадянка поўнасцю прызнала. У дачыненні да яе прыменена мера стрымання ў выглядзе асабістага паручыцельства», — паведаміў намеснік пракурора Фрунзенскага раёна сталіцы Андрэй Сербун.