У Польшчы рыхтуюцца да магчымага ўводу еўрапейскіх войскаў ва Украіну

• 18.10.2026, 14:23

Прыедзе паўтары тысячы вайскоўцаў.

У лістападзе Польшча прыме маштабныя ваенныя вучэнні, звязаныя з магчымым размяшчэннем еўрапейскага кантынгенту ва Украіне пасля спынення агню. Пра гэта паведамляе брытанская газета The Times.

У манеўрах возьмуць удзел не менш як паўтары тысячы вайскоўцаў з Вялікабрытаніі, Францыі, Германіі і Польшчы.

Асноўная ўвага будзе нададзена перакідванню войскаў і арганізацыі забеспячэння: дастаўцы паліва, прадуктаў харчавання і іншых неабходных грузаў. Вайскоўцы правераць, наколькі хутка і зладжана саюзнікі змогуць арганізаваць такую аперацыю.

Паводле The Times, брытанскі бок ужо пацвердзіў правядзенне вучэнняў.

Лондан і Парыж выступаюць за падрыхтоўку еўрапейскіх гарантый бяспекі для Украіны. Адзін з магчымых сцэнароў прадугледжвае размяшчэнне замежных вайскоўцаў пасля заключэння перамір’я. Іх прысутнасць павінна стрымліваць Расію ад новай агрэсіі.

Польшчы ў гэтым плане адводзіцца важная роля ў забеспячэнні і каардынацыі аперацыі.

Пры гэтым пакуль ідзе гаворка пра падрыхтоўку да магчымага сцэнару, а не пра прынятае рашэнне накіраваць войскі ва Украіну. Тэрміны і ўмовы такой місіі яшчэ не вызначаныя.