Амерыканец з доктарскай ступенню безвынікова падаў 2,3 тыс. заяў на працу

• 19.10.2026, 6:53

Гісторыя адлюстроўвае складаную сітуацыю на «замарожаным» рынку працы ЗША.

У ЗША пошукальнік працы з доктарскай ступенню па хімічнай інжынерыі падаў больш за 2,3 тыс. заяў на працу, але ўладкавацца не здолеў, паведамляе The Wall Street Journal. Амерыканец Джэк Уэйс з Солт-Лейк-Сіці скончыў Прынстанскі ўніверсітэт у 2024 годзе. Пасля няўдалых спроб атрымаць працу ў сферы карпаратыўнай навукі і ў паслядоктаральных праграмах Уэйс пашырыў кола пошукаў і спрабаваў уладкавацца ў кампаніі па распрацоўцы праграмнага забеспячэння і нават у харчовай прамысловасці, але таксама безвынікова.

Выданне адзначае, што гэтая гісторыя адлюстроўвае складаную сітуацыю на «замарожаным» рынку працы ЗША. Людзі неахвотна змяняюць працу, а беспрацоўныя сутыкаюцца з цяжкасцямі праз звязаны з гэтым нізкі ўзровень найму. Асабліва цяжка маладым спецыялістам з вышэйшай адукацыяй, у той час як становішча работнікаў без дыпломаў крыху лепшае.

Паводле дадзеных Gallup, толькі 34% амерыканцаў лічаць цяперашні час спрыяльным для пошуку годнай працы. Адначасова больш за 70% апытаных Pew Research Center мяркуюць, што з цягам часу ШІ яшчэ больш скараціць агульную колькасць працоўных месцаў.