Украінскі артылерыст расказаў пра наступ ЗСУ на Слабажаншчыне

• 19.10.2026, 20:35

Расіяне не паспявалі забіраць свае гарматы.

Падчас імклівага наступу на Слабажаншчыне расійскія артылерысты пакідалі пазіцыі так паспешліва, што не паспявалі забіраць свае гарматы. У той жа час украінскія байцы рамантавалі пакінутую тэхніку і выкарыстоўвалі яе супраць ворага.

Пра гэта расказаў вайсковец 40-й асобнай артылерыйскай брыгады імя Вялікага князя Вітаўта з пазыўным «Колумб», паведамляе Цензор.НЕТ.

«Колумб» удзельнічае ў баях за Купянск і ў бітве за Бахмут. У відэа ён называе наступ на Слабажаншчыне найбольш запамінальным.

Паводле слоў вайскоўца, прасоўванне было настолькі хуткім, што расійскія разлікі не паспявалі вывезці артылерыю.

«Прыязджаем на пазіцыю — а там іх гармата: то кола спушчана, то пашкоджаная, то перакуленая», — расказаў ён.

Для такіх выпадкаў ЗСУ хутка фармавалі рамонтныя брыгады. Тэхніку прыводзілі да ладу і зноў вярталі ў строй.

«Бывала, што стралялі па ворагу з яго ж гармат і нават яго ж снарадамі», — сказаў «Колумб».

Асобна вайсковец узгадаў эпізод, калі чацвёртая батарэя паразіла рухомы танк.

«Узялі яго на апярэджанне — і трапілі. Выглядала феерычна», — расказаў ён. Паводле слоў артылерыста, у такія моманты асабліва добра відаць, наколькі важныя зладжанасць разліку і кожная секунда ў працы.

Кажучы пра ролю беспілотнікаў, «Колумб» адзначыў, што пра іх цяпер шмат гавораць, і яны сапраўды дапамагаюць на полі бою. Аднак, паводле яго слоў, артылерыя застаецца незаменная.

«Я заўсёды кажу: дроны — гэта дроны, а артылерыя — гэта артылерыя. Без яе, адназначна, ні адна вайна не абыходзіцца», — рэзюмаваў ён.