У Сербіі затрымалі лаяльных да Вучыча высокапастаўленых сілавікоў
- 2.11.2026, 11:29
Іх можа чакаць турма.
У Бялградзе 1 лістапада затрымалі начальніка Упраўлення крымінальнай паліцыі Сербіі Марка Крычака і кіраўніка службы па барацьбе са злачыннасцю Бошка Секуловіча. Іх падазраюць у злоўжываннях пры расследаванні забойства, а Крычака — таксама ў катаваннях. Пра затрыманні паведаміла Вышэйшая пракуратура Бялграда.
Справа датычыцца расследавання забойства Аляксандра Нешавіча у рэстаране «27» у бялградскім раёне Сеняк 12 мая. Паводле версіі пракуратуры, двое кіраўнікоў паліцыі перавысілі паўнамоцтвы і парушылі правы былога начальніка бялградскай паліцыі Веселіна Міліча, піша RTVI.
Як вынікае з падрабязнай заявы ведамства, Секуловіч накіраваў матэрыялы, у якіх Міліча падазравалі ў дапамозе злачынцу пасля забойства і ў непаведамленні пра злачынства. Пры гэтым, сцвярджае пракуратура, паліцэйскі ведаў пра паказанні і запісы камер, якія пацвярджалі, што Міліч пакінуў рэстаран да здарэння. Крычак, паводле версіі слядства, ухваліў перадачу гэтых матэрыялаў.
Пракуратура таксама заявіла пра затрымку перадачы вылучаных тэлефонаў і відэазапісаў ваеннай паліцыі для даследавання. Нягледзячы на шматразовыя патрабаванні пракурора, доказы перадалі толькі праз некалькі дзён, прычым электронныя прылады былі неналежным чынам упакаваныя.
Асобны эпізод датычыцца абыходжання з уладальнікам рэстарана. Слядства падазрае, што 16 мая Крычак разам з іншымі паліцэйскімі збіваў і катаваў яго ў памяшканні Упраўлення крымінальнай паліцыі. Абодвух кіраўнікоў падазраюць у злоўжыванні службовым становішчам, Крычаку дадаткова інкрымінуюць жорсткае абыходжанне і катаванні.
Галоўны пракурор Бялграда Ненад Сцяфановіч асобна адхіліў палітычную сувязь затрыманняў з нядаўнім галасаваннем.
«Сённяшняе затрыманне ніяк не звязана з выбарчымі працэсамі і вынікамі парламенцкіх выбараў», — заявіў ён.
Паводле слоў Сцяфановіча, папярэдняя праверка пачалася яшчэ ў маі, калі ўзніклі перашкоды ў працы пракурораў. У канцы ліпеня да матэрыялаў далучылі заяву адвакатаў пацярпелага.
Крычака лічылі кіраўніком, лаяльным да экс-прэзідэнта Аляксандра Вучыча, а сам палітык публічна хваліў яго працу, адзначае Euronews. Удзельнікі антыўрадавых пратэстаў раней абвінавачвалі Крычака і яго падраздзяленне ў гвалце; МУС адхіляла гэтыя заявы. Пасля выбараў пераможны «Студэнцкі спіс» патрабаваў адстаўкі шэрагу кіраўнікоў паліцыі і спецслужбаў, уключна з Крычаком.