За расіян, якія купляюць кватэры ў Беларусі, узялася падатковая РФ

• 2.11.2026, 15:14

Пачалася праверка.

Федэральная падатковая служба (ФНС) Расіі пачала правяраць здзелкі расіян з нерухомасцю ў Беларусі, піша тэлеграм-канал Baza.

Інспектары правяраюць, ці дэкларавалі расіяне даходы ад продажу кватэр і здачы іх у арэнду за мяжой. Як перадае Baza, цікавасць расіян да беларускай нерухомасці расце: толькі ў Мінску ў 2026 годзе грамадзяне РФ набылі больш чым у два разы больш кватэр, чым годам раней. Папулярнасцю карыстаюцца і іншыя гарады — Гомель, Рагачоў, Магілёў і Брэст.

Падатковы юрыст Раман Пургін растлумачыў Baza, што сплата падатку ў Беларусі не заўсёды вызваляе расіян ад абавязкаў на радзіме. Падатковыя рэзідэнты РФ могуць залічыць суму, заплачаную за мяжой, але розніцу давядзецца даплаціць, калі расійскі падатак акажыцца вышэйшы. Пры гэтым продаж кватэры можа не абкладацца падаткам на даходы фізасоб, калі выкананы мінімальны тэрмін валодання — тры або пяць гадоў.