Пуцін даручыў канфіскаваць у бюджэт грошы памерлых расіян

• 3.11.2026, 7:12

Новыя правілы тычацца грашовых сродкаў у рублях і замежнай валюце, а таксама каштоўных металаў.

Дыктатар Расіі Уладзімір Пуцін падпісаў указ аб парадку перадачы дзяржаве незапатрабаванай (вымарочнай) маёмасці памерлых грамадзян. Новыя правілы тычацца грашовых сродкаў у рублях і замежнай валюце, а таксама каштоўных металаў, што знаходзяцца на банкаўскіх рахунках і ўкладах. Пералічаныя актывы будуць канфіскоўвацца ў тым выпадку, калі з дня смерці ўладальніка мінула больш за пяць гадоў і спадчынныя справы пры гэтым не адкрываліся, перадае The Moscow Times.

Улады збіраюцца пацвярджаць права дзяржавы на канфіскацыю спецыяльным пералікам памерлых грамадзян, чыя маёмасць прызнаная вымарочнай. Ён будзе змяшчаць персанальныя даныя, уключна з прозвішчам, імем, імем па бацьку, датамі нараджэння і смерці, ІНН, а таксама рэквізіты банкаўскіх рахункаў і ўкладаў з указаннем банкаў, у якіх яны адкрыты. Фармаванне пераліку даручана Росимуществу на падставе звестак Федэральнай падатковай службы, натарыяльнай палаты, судовых прыставаў і банкаў.

Згодна з дакументам, ФНС павінна перадаць ведамству неабходную інфармацыю да 1 снежня 2026 года. Пасля гэтага яе накіруюць у Федэральную натарыяльную палату для праверкі, каб пераканацца, што законныя спадкаемцы не заявілі пра свае правы.

Акрамя таго, Пуцін абавязаў урад да 1 красавіка 2027 года падрыхтаваць прапановы аб змяненні заканадаўства, якія вызначаць парадак выяўлення маёмасці, што падлягае перадачы дзяржаве ў парадку спадкавання.

Указ таксама рэгулюе працу з рознымі відамі актываў. Сродкі ў замежнай валюце будуць аўтаматычна пералічвацца ў рублях, а кошт каштоўных металаў вызначаць або паводле ўмоваў банкаўскага дагавора, або па ўліковай цане, усталяванай Цэнтрабанкам.

У 2025 годзе ініцыятыву аб канфіскацыі ў бюджэт грошай памерлых расіян падтрымалі ў Дзярждуме. Тады казалі, што можа ісціся пра суму ў некалькі сотняў мільярдаў рублёў.

Новая мера ўводзіцца на фоне росту дэфіцыту федэральнага бюджэту. Па выніках студзеня–верасня 2026 года ён склаў 5,2 трлн рублёў, або 2,2% ВУП, паведамляў Мінфін РФ. Паказчык на 50% перавысіў узровень аналагічнага перыяду 2025-га. Ведамства чакае дэфіцыт у 7,3 трлн рублёў па выніках года, што ўдвая вышэй за першапачатковы план.