Зяленскага папрасілі апісаць ягоныя адносіны з Трампам адным словам

• 3.11.2026, 15:38

Прэзідэнт Украіны пракаментаваў «дызельную здзелку» ЗША і РФ.

Прэзідэнт Украіны Уладзімір Зяленскі расказаў, якія ў яго адносіны з прэзідэнтам ЗША Дональдам Трампам. Пра гэта ён заявіў у інтэрв'ю PBS News Hour.

Зяленскага папрасілі ахарактарызаваць адносіны з Трампам, улічваючы, што амерыканскі прэзідэнт раней казаў пра неабходнасць перавыбраць украінскага лідара, змякчыў санкцыі супраць Расіі і дамовіўся аб закупе расійскага паліва. Зяленскі адказаў адным словам: «эмацыйныя».

Па яго словах, у гэтай вайне трэба быць прагматычнымі. «Хто з'яўляецца ворагам? Хто пачаў гэтую вайну? Пуцін. Не знаходжу адпаведных слоў, каб апісаць яго. Я не ўпэўнены, што гэта будзе карысна», — сказаў ён.

Асобна Зяленскі адрэагаваў на паліўнае пагадненне Трампа. «Калі для вас сапраўды важныя грошы, бізнес і прагматызм, тады не кажыце, што гэта паўплывае на цану ў Злучаных Штатах. Не, гэта няпраўда. Гэта так не працуе. Таму, калі мы гаворым пра прагматычныя рэчы, мы павінны падтрымліваць Украіну, бо яна павінна быць моцнай. Інакш Пуцін пойдзе далей у Еўропу і ў розныя часткі краін НАТА», — перакананы ён.

Прэзідэнт Украіны лічыць, што ў такой сітуацыі Амерыцы давядзецца прымаць складаныя рашэнні. «Гэта вельмі небяспечна. Таму лепш умацоўваць Украіну, бо мы насамрэч абараняем Еўропу, а не толькі сябе. Лепш мацней ціснуць на Пуціна, а не на мяне. Не на мяне. Я не з тых, хто паводзіць сябе агрэсіўна. Гэта не я», — падкрэсліў Зяленскі.

Менавіта таму, паводле яго слоў, адносіны з Трампам маюць эмацыйны характар.