Рэспубліканцы выдаткавалі больш за $200 мільёнаў на рэкламу ў інтэрнэце

• 3.11.2026, 17:01

Бітва за Кангрэс разгарнулася на стрымінгавых сэрвісах і ў сацыяльных сетках.

Галоўны палітычны камітэт, які падтрымлівае рэспубліканцаў на выбарах у Сенат ЗША, выдаткаваў больш за 200 млн долараў на рэкламу ў стрымінгавых сэрвісах і сацыяльных сетках у выбарчым цыкле 2026 года. Гэта амаль утрая больш, чым у 2024 годзе, калі выдаткі складалі 71 млн долараў. У некаторых штатах на лічбавую рэкламу прыпадае палова бюджэту камітэта, піша Axios (пераклад — сайт Charter97.org).

Ідзе пра «Senate Leadership Fund» — уплывовы суперкамітэт палітычных дзеянняў (Super PAC), які фінансуе кандыдатаў-рэспубліканцаў. У паказаную суму таксама ўваходзяць сродкі, накіраваныя праз звязаны з ім тэхаскі палітычны камітэт і арганізацыю One Nation.

Стрымінгавыя платформы дазваляюць больш дакладна нацэльваць рэкламу на пэўныя групы выбарцаў, ацэньваць яе эфектыўнасць і выкарыстоўваць розныя фарматы. «Гэта значна больш прыцэльная рэклама, чым звычайная купля эфірнага часу на тэлебачанні», — заявіў Зак Родэй з рэкламнай кампаніі Think Big.

Пры гэтым лічбавыя пляцоўкі самастойна ўсталёўваюць правілы размяшчэння палітычнай рэкламы. Напрыклад, Netflix і TikTok не прымаюць аб'явы кандыдатаў і палітычных арганізацый. Акрамя таго, выдаткі на стрымінгавую рэкламу складаней адсочваць: на іх не распаўсюджваюцца тыя ж патрабаванні да раскрыцця інфармацыі, што і на традыцыйную тэлевізійную рэкламу.

Дэмакраты таксама павялічылі выдаткі на лічбавыя кампаніі. Іх галоўны сенатскі суперкамітэт «Senate Majority PAC» паведаміў, што ў гэтым цыкле ўклаў у лічбавую камунікацыю больш сродкаў, чым калі-небудзь раней.

«Гэта дакладна стане галоўнай тэмай 2028 года», — заявіў Кені Дэй з рэкламнай кампаніі IQM, кажучы пра будучыню палітычнай рэкламы ў інтэрнэце.