Заводы гараць як свечкі

• Аббас Галлямаў
• 3.11.2026, 18:20

Таямніца званка Пуціна ў Іран.

Нешта вельмі важнае адбываецца ў трохвугольніку Тэгеран–Масква–Вашынгтон, а можа, і ў чатырохвугольніку Тэгеран–Масква–Вашынгтон–Кіеў.

27 кастрычніка Пуцін сустрэўся з Пезешкіянам, які прыляцеў у Маскву, а ўчора патэлефанаваў сакратару Савета бяспекі Ірана Рэзаі.

Навошта спатрэбіўся Рэзаі? Калі з’явіліся нейкія свежыя навіны ў дадатак да таго, што толькі што абмеркавалі з Пезешкіянам, — дык і тэлефануй Пезешкіяну. Навошта змяняць тамаду ў разгары застолля?

Ды яшчэ Пуцін зусім нядаўна сустракаўся з тым самым Пезешкіянам у Туркменістане — літаральна тры тыдні таму. Ды ўвогуле, калі ўжо на тое пайшло, за той час, што сённяшні прэзідэнт Ірана пры ўладзе, яны з Пуціным сустракаліся 8 разоў, не лічачы тэлефонных перамоў. А вось з Рэзаі Пуцін ні разу не меў зносін, а тут раптам вырашыў патэлефанаваць. Пазнаёміцца. Гэта ж Пуцін, які наогул з цяжкасцю прывыкае да новых людзей.

Як хочаце, але гэта навіна.

Сакрэт яе ў тым, што Пезешкіян — умераны, а вось Рэзаі — хардлайнер. Ён былы шматгадовы кіраўнік КСІР. Пра адносіны гэтых двух лагераў вы ведаеце. Там не толькі розныя ідэалогіі і інтарэсы, яны адзін аднаго не пераносяць літаральна ўжо на ўзроўні эстэтыкі. Як кажуць, «я такую непрыязь адчуваю да пацярпелага, што есці не магу».

Мяркую, што падчас размовы Пуціна з Пезешкіянам усплыла нейкая праблема, пра якую прэзідэнт Ірана сказаў, што не ў стане яе вырашыць. Маўляў, вы ж ведаеце, у нас хардлайнеры самі па сабе, мы ім не ўказ. Вось і давялося Пуціну званіць ім асабіста.

Пра што ішла гаворка? Натуральна, пра выбар паміж вайной і здзелкай. Там цяпер усё пра гэта.

Званок Пуціна быў патрэбны, бо ў спрэчцы з умеранымі, якія сцвярджаюць, што рэсурсы краіны вычарпаныя і трэба ісці на здзелку, хардлайнеры крычаць: «Нам Масква дапаможа».

«Не дапаможа», — павінен быў сказаць Пуцін. Толькі, вядома, ветліва: маўляў, у нас вайна, заводы гараць як свечкі, ды ўвогуле, вам лепш дамовіцца з Трампам.

Чаму я ў пачатку тэксту ўзгадаў Кіеў? Таму што, калі мая гіпотэза правільная, то Пуцін дапамагае Трампу з Іранам у абмен на тыя антыўкраінскія крокі, якія той апошнім часам робіць.

Бжэзінскі называў гэта «Вялікай шахматнай дошкай». Вось толькі ў якасці фігурак на ёй — жывыя людзі.

Аббас Галлямаў, Telegram