Зяленскі раскрыў прыярытэты мірных перамоў у Абу-Дабі

• 3.11.2026, 18:38

Яны запланаваныя на 10–11 лістапада.

Украіна павінна абмеркаваць гарантыі бяспекі на будучых мірных перамовах у Абу-Дабі. Таксама важныя пытанні ўдараў па энергетыцы, разблакаванне «зернавага калідора», абмену ваеннапалоннымі і сустрэчы лідараў дзяржаў.

Пра гэта паведамляе РБК-Украіна са спасылкай на заяву прэзідэнта Украіны Уладзіміра Зяленскага падчас сустрэчы з федэральным канцлерам Германіі Фрыдрыхам Мерцам у Берліне, перадае Офіс Прэзідэнта Украіны.

Гарантыі бяспекі для Украіны

Зяленскі адзначыў, што найперш амерыканскі бок ужо падаў сігналы, што «хоча гаварыць пра гарантыі бяспекі для Украіны». Таксама будзе абмяркоўвацца Prosperity Package — пакет аднаўлення Украіны.

«Яны таксама абмяркоўваюць з нашай камандай пытанні, якія мы хочам падняць на сустрэчы 10–11 лістапада ў Абу-Дабі. Для нас гэта прыярытэтныя рэчы», — кажа прэзідэнт.

Ён назваў чатыры прыярытэты мірных перамоў, якія, на яго думку, для ўсіх нармальных людзей таксама павінны быць галоўнымі.

Першы — гэта энергетыка, то бок спыненне агню і блакаванне удараў па энергетычнай і крытычнай інфраструктуры.

Другім прыярытэтам Зяленскі назваў зерне, а значыць, разблакаванне Чорнага мора, у якім зацікаўленыя Украіна, Расія, іншыя краіны Афрыкі і Азіі і партнёры Украіны.

«Трэцяе. Ідзе гаворка пра тое, у якім фармаце Украіна можа павялічыць колькасць абменаў. Пажадана, каб гэта быў абмен усіх на ўсіх, але, прынамсі, трэба знайсці спосаб зрабіць абмены і вяртанне людзей дадому больш інтэнсіўнымі», — адзначыў украінскі прэзідэнт.

Чацвёртым аспектам Зяленскі назваў падрыхтоўку сустрэчы на ўзроўні лідараў у трохбаковым фармаце з абавязковай прысутнасцю Еўропы.

«Тут я згодзен з Фрыдрыхам (Мерцам — рэд.): у нас аднолькавае бачанне. Не можа быць стабільнага і ўстойлівага міру, калі Еўропа не будзе ўцягнутая ў перамовы ў тым ці іншым фармаце», — кажа ён.