Мерц анансаваў новую сустрэчу лідараў «кааліцыі ахвотных»

• 3.11.2026, 20:18

Яна адбудзецца ў другой палове лістапада.

Германія разам з Францыяй і Вялікабрытаніяй правядзе ў другой палове лістапада ў Берліне чарговую сустрэчу «кааліцыі ахвотных» па Украіне на ўзроўні кіраўнікоў дзяржаў і ўрадаў, заявіў канцлер ФРГ Фрыдрых Мерц на сумеснай прэс-канферэнцыі з Уладзімірам Зяленскім у Берліне, піша Zdfheute.

«Прыйшоў час скончыць гэтую вайну», — заявіў Мерц.

Як удакладняе Tagesspiegel, саміт прызначаны на 19 лістапада. Паводле слоў канцлера, у нямецкую сталіцу прыйдзе «вялікая колькасць» кіраўнікоў дзяржаў і ўрадаў. Ён адзначыў, што пойдзе гаворка пра каардынацыю дапамогі Кіеву, магчымыя гарантыі бяспекі пасля завяршэння канфлікту і ўзгадненне дыпламатычных намаганняў па ўрэгуляванні. На сустрэчы таксама павінны ўзгадніць пазіцыю па мірных перамовах і знайсці рашэнне праблемаў з пастаўкамі ўзбраенняў.

«Кааліцыя ахвотных» — гэта аб'яднанне з больш чым 30 краін, галоўным чынам еўрапейскіх, якія дапускаюць свой удзел у магчымай міратворчай місіі ва Украіне. Каардынацыйную ролю ў ёй адыгрываюць Францыя і Вялікабрытанія. Пра стварэнне кааліцыі на пачатку сакавіка 2025 года абвясціў прэм'ер-міністр Вялікабрытаніі Кір Стармер.