Керч цалкам засталася без святла

• 4.11.2026, 4:13

Раней расійскія акупанты скардзіліся на атаку дронаў.

Горад Керч на акупаваным Крымскім паўвостраве застаўся без электраэнергіі з-за надзвычайнага здарэння на аб'екце энергасістэмы па-за межамі Крыму. Пра гэта паведамляе тэлеграм-канал «МыКЕРЧЬ.РФ».

Паводле слоў дарадцы «кіраўніка» Крыму Алега Кручкова, у энергасістэме па-за межамі паўвострава адбылася аварыя. У сувязі з гэтым была абмежавана падача электраэнергіі. Цяпер у энергасістэме вядуцца аднаўленчыя працы.

Да гэтага «губернатар» Севастопаля Міхаіл Разважаеў у тэлеграм-канале паведаміў, што ўначы ЗСУ нанеслі ўдары па аб'ектах энергетычнай інфраструктуры па-за межамі горада. Ён удакладніў, што асноўную частку электраэнергіі Севастопаль атрымлівае з іншых рэгіёнаў, таму наступствы гэтых пашкоджанняў наўпрост адбіваюцца на энергазабеспячэнні горада.

Паводле слоў «губернатара», цяпер дзейнічаюць абмежаванні на падачу электраэнергіі. Ён дадаў, што ў цяперашняй сітуацыі пакуль не ўдасца прытрымлівацца нават графіка «2 праз 6».