Зяленскі прыехаў на Данбас і згадаў пра Лукашэнку

• 6.03.2026, 19:37

Украінскі прэзідэнт заявіў, што зло трэба спыніць.

Прэзідэнт Украіны Уладзімір Зяленскі наведаў Данецкую вобласць, дзе расійскія акупанты, па ягоных словах, рыхтуюць вясновае наступленне.

Пра гэта паведамляе прэзідэнт Украіны ў «Фэйсбуку».

«Дружкаўка, Краматорск, Славянск і іншыя гарады. Расіяне не адмаўляюцца ад вайны і тут, на Данеччыне, вясной плануюць наступленне. Вельмі важна, каб нашы пазіцыі былі моцнымі і каб брыгады былі забяспечаныя ўсім неабходным», — падкрэсліў Зяленскі.

Ён адзначыў, што ўкраінскія абаронцы трымаюцца годна, а аналагічна павінны дзейнічаць дыпламатыя і ўвесь украінскі народ.

«Усім нашым партнёрам — у Амерыцы, у Еўропе і дзе заўгодна — трэба ясна разумець: Пуцін, іранскі рэжым, Паўночная Карэя, Лукашэнка і іншыя падобныя сілы аб’ядноўваюцца толькі дзеля таго, каб рабіць тое, што хочуць, як гэта адбываецца з нашым Данбасам», — дадаў прэзідэнт Украіны.

Зяленскі заявіў, што зло трэба спыніць, чым украінскія ваяры і займаюцца на Данбасе.