Бельгія і Іспанія выдзеляць па 1 млрд еўра на ваенную дапамогу Украіне
- 13.04.2026, 22:55
Кіеў атрымае СПА, дроны і самалёты F-16.
Улады Бельгіі і Іспаніі прадаставяць Украіне ў 2026 годзе па 1 млрд еўра дапамогі — грошы будуць накіраваныя на СПА, дроны, самалёты F-16 і артылерыйскія снарады для фронту.
Пра гэта 13 красавіка паведаміў міністр абароны Міхаіл Фёдараў па выніках перамоваў з міністрамі абароны Бельгіі Тэо Франкенам і Іспаніі Маргарытай Роблес, якія адбыліся напярэдадні новага пасяджэння ў фармаце Рамштайн.
«Бельгія выдзяляе сёлета 1 млрд еўра абароннай дапамогі Украіне. Таксама краіна пацвердзіла намер перадаць Украіне дадатковыя знішчальнікі F-16 і забяспечыць пастаўкі запасных частак для наяўных самалётаў. Сёлета Іспанія таксама выдзяляе 1 млрд еўра на падтрымку Украіны. Падчас сустрэчы надалі ўвагу развіццю супрацоўніцтва абаронных індустрый, у прыватнасці ў межах еўрапейскага механізму SAFE. Мы гатовыя прапанаваць пералік вытворцаў, якія могуць наладзіць супрацоўніцтва з іспанскімі кампаніямі», — напісаў ён.
Акрамя таго, са свайго боку, як заявіў Фёдараў, Украіна прапанавала магчымасць выпрабоўваць іспанскія дроны і ў баявых умовах.
«Падзякаваў Бельгіі і Іспаніі за паслядоўную падтрымку. Дзякуючы ўзаемавыгаднаму супрацоўніцтву з партнёрамі Украіна працягвае стрымліваць прасоўванне ворага на зямлі і дэакупаваць тэрыторыі, абараняць неба і павышаць эфектыўнасць перахопу ракет і дронаў, а таксама ўзмацняць удары па эканоміцы Расіі», — рэзюмаваў міністр абароны Украіны.
Саветнік з заходняй краіны, які працуе разам з Паветранымі сіламі Украіны, паведаміў у інтэрв’ю NRK, апублікаваным 8 красавіка, што шэсць знішчальнікаў F-16, якія Нарвегія абяцала Украіне, да гэтага часу не перададзены.
Міністр абароны Нарвегіі Торэ Сандвік пацвердзіў, што самалёты сапраўды яшчэ знаходзяцца на рамонце ў Бельгіі. Ён таксама адзначыў, што лепшыя знішчальнікі F-16, якія Нарвегія мела на ўзбраенні, прадалі Румыніі.
«32 самалёты, якія былі ў лепшым стане, а таксама абсталяванне для майстэрняў і запасныя часткі ў выніку прадалі Румыніі, каб падтрымаць саюзную краіну ва ўмацаванні НАТА ў Паўднёвай Еўропе», — адзначыў Сандвік.