Атака дронаў паралізавала працу аэрапортаў у РФ

• 8.05.2026, 22:58

Абмежаванні закранулі Маскву і поўдзень краіны-агрэсара.

У Расіі пасля атакі беспілотнікаў часова закрывалі 15 аэрапортаў. Абмежаванні закранулі як маскоўскія аэрапорты, так і паветраныя гавані на поўдзі краіны, паведамляе DW.

У ноч на пятніцу, 8 мая, Маскву атакавалі беспілотнікі. Мэр горада Сяргей Сабянін сцвярджае, што расійская СПА збіла нібыта не менш за 20 дронаў, якія рухаліся ў бок сталіцы краіны-агрэсара.

«Спецыялісты экстранных службаў працуюць на месцы падзення абломкаў», — напісаў ён у сваім Telegram-канале.

З-за атакі дронаў была прыпыненая праца аэрапортаў Внукава і Дамадедава.

Раней паведамлялася, што ў аэрапортах сталіцы краіны-агрэсара затрымалі і адмянілі больш як 450 рэйсаў. Мясцовыя ўлады сцвярджаюць, што прычынай стала «атака украінскіх беспілотнікаў».

Пазней Расавіяцыя апублікавала папярэджанне, з якога вынікала, што аэрапорты на поўдні Расіі будуць закрытыя да 12 мая з-за ўдару БПЛА па філіяле «Аэранавігацыі Поўдня Расіі» ў Растове-на-Доне.

Аднак удзень у пятніцу, 8 мая, ведамства адмяніла выпушчанае раней апавяшчэнне пра немагчымасць палётаў на поўдзень Расіі.

«Падведамасная Расавіяцыі Дзяржкарпарацыя па АПР гатовая да абслугоўвання рэйсаў у аэрапортах Астрахані, Уладзікаўказа, Валгаграда, Геленджыка, Грознага, Краснадара, Махачкалы, Магаса, Мінеральных Водаў, Нальчыка, Сочы, Стаўрапаля і Элісты», — заявілі ў ведамстве.

Частковае адкрыццё паветранай прасторы над поўднем РФ пацвердзіла расійская Асацыяцыя тураператараў (АТОР).

Паводле звестак Мінтранса РФ, да канца сутак паўднёвыя аэрапорты павінны прыняць 217 рэйсаў. Гэта амаль удвая менш за звычайны сутачны трафік, адзначаюць у АТОР.