Дроны атакавалі Самарскую вобласць РФ: гарыць чарговы буйны НПЗ

• 10.06.2026, 8:16

Пасля серыі выбухаў пачаўся пажар і ўзняўся густы чорны дым.

Пад раніцу 10 чэрвеня беспілотнікі дабраліся да Самарскай вобласці Расіі. Пад атаку трапіў Навакуйбышаўскі нафтаперапрацоўчы завод.

Пасля серыі выбухаў узнік пажар, а над тэрыторыяй НПЗ ўзняўся густы чорны дым. Пра гэта паведамілі OSINT-каналы, піша «Фокус».

«Самара, атакаваны Навакуйбышаўскі НПЗ», — пішуць аналітыкі.

Хоць падрабязнасці атакі і вынікі ўдараў на прадпрыемстве пакуль невядомыя, у сеціве паказалі кадры налёту дронаў на аб’ект. На відэа чутныя гукі пралёту БПЛА, а таксама выбухі.

Губернатар Самарскай вобласці РФ на момант публікацыі не пацвярджаў і не каментаваў атакі на рэгіён. У мясцовых Telegram-каналах толькі папярэджвалі пра пагрозу дронаў для Самары і вобласці каля 04:00.

Варта адзначыць, што Навакуйбышаўскі НПЗ — адзін з найбуйнейшых нафтаперапрацоўчых заводаў у Расіі, у рэгіёне Паволжжа. Ён уваходзіць у групу кампаній нафтавага гіганта РФ «Раснафта».

Вядома, што цяпер перапрацоўчыя магутнасці НПЗ складаюць не менш як 8–9 мільёнаў тон нафты ў год.

Гэта прадпрыемства ўжо неаднаразова аказвалася пад атакай дронаў. Апошні раз масіраваны ўдар па аб’екце быў зафіксаваны ў красавіку гэтага года, пасля чаго ўспыхнуў маштабны пажар.