Geely Emgrand стаў найбольш аварыйным аўтамабілем Беларусі

• 10.06.2026, 9:59

Апублікаваны рэйтынг паводле колькасці страхавых выпадкаў.

Міністэрства фінансаў Беларусі апублікавала рэйтынг транспартных сродкаў з найбольшай колькасцю страхавых выпадкаў па абавязковым аўтастрахаванні за 2025 год і першыя чатыры месяцы 2026-га. Сярод легкавых аўтамабіляў часцей за ўсё ў ДТЗ траплялі машыны марак Volkswagen, Renault і Opel, а самай аварыйнай мадэллю стаў Geely Emgrand.

Паводле даных ведамства, сярод марак легкавых аўтамабіляў першае месца па колькасці страхавых выпадкаў заняў Volkswagen, другое — Renault, трэцяе — Opel.

Сярод асобных мадэляў лідарам аказаўся Geely Emgrand. У тройку таксама ўвайшлі Volkswagen Polo і Renault Logan.

Сярод аўтамабіляў, якія выкарыстоўваюцца ў таксі, часцей за ўсё страхавыя выпадкі фіксаваліся ў BAIC U5 Plus, BYD Qin Plus і BYD e2.

У катэгорыі грузавога транспарту лідарамі сталі Renault Master, Fiat Ducato і Peugeot Boxer.

Сярод матацыклаў найбольшая колькасць страхавых выпадкаў прыпала на Minsk D4 125, Stels RK125 і VMC CM48Q.

У Мінфіне асобна падкрэслілі, што трапленне аўтамабіля ў рэйтынг не абавязкова сведчыць пра яго небяспечнасць або нізкую надзейнасць. Высокія паказчыкі могуць тлумачыцца папулярнасцю мадэлі на дарогах, а таксама актыўным выкарыстаннем у таксі, каршэрынгу і службах дастаўкі, дзе прабег значна вышэйшы за сярэдні.

У ведамстве таксама дадалі, што ў Беларусі штогод фіксуецца больш за 90 тысяч страхавых выпадкаў па абавязковым аўтастрахаванні.