У Яраслаўскай вобласці РФ прайшоў «мазутны дождж»

• 14.06.2026, 16:06

Ападкі выпалі пасля ўдару беспілотнікаў па паліўным сховішчы Расрэзерву.

У Рыбінскай акрузе Яраслаўскай вобласці выпаў «мазутны дождж» пасля ўдару ўкраінскіх беспілотнікаў па камбінаце «Тэмп» Расрэзерву, які выкарыстоўваецца для захоўвання паліва. У мясцовых пабліках выкладваюць фатаграфіі раслін і прадметаў, пакрытых чорнымі кроплямі і суцэльнай нафтавай плёнкай. Жыхары баяцца, што глеба будзе атручаная на многія гады. «Я ў шоку. Прыехалі, а ў нас уся дача, наогул усё ў гэтым мазуце. Усе расліны, усё. „Дождж“ прайшоў», — заявіла адна з чытачак 76.RU. Таксама ў Сеціва выклалі відэа ракі Волготні, пакрытай нафтавай плёнкай, у вёсцы Волкава за 20 кіламетраў ад Рыбінска. У Распатрэбнаглядзе сітуацыю не каментавалі.

Украінскія беспілотнікі атаквалі Яраслаўскую вобласць уначы на 14 чэрвеня. Губернатар Міхаіл Еўраеў паведаміў пра «пападанне ў прамысловыя аб’екты па захоўванні паліва» з наступным пажарам. У інтэрнэце з’явіліся відэа відавочцаў з густым чорным дымам над камбінатам «Тэмп» у Рыбінску. У Службе бяспекі Украіны заявілі пра «як мінімум тры буйныя ачагі ўзгарання ў рэзервуарным парку, які налічвае больш за 60 ёмістасцяў» аб’ёмам ад 2000 да 5000 кубаметраў. Паводле звестак ведамства, на аб’екце захоўваюцца бензін, дызельнае паліва і іншыя гаруча-змазачныя матэрыялы. «Адсюль РФ пастаўляе нафтапрадукты для сваіх паўночна-ўсходніх рэгіёнаў і забяспечвае стратэгічныя запасы паліва для патрэб арміі», — адзначылі ў СБУ.

Аналагічныя «нафтавыя дажджы» раней выпалі ў Туапсэ і ў Рязані пасля удараў па мясцовых нафтаперапрацоўчых заводах, а таксама ў Пермі, дзе была пашкоджаная лінейная вытворча-дыспетчарская станцыя «Транснафты». Экалогі і хімікі папярэджвалі, што ў падобных ападках і ў смузе змяшчаюцца адны з самых шкодных рэчываў — поліараматычныя вуглевадароды (ПАВ), уключаючы бензол — канцэраген першага класа небяспекі.