У Іркуцкай вобласці РФ пачалі адключаць вулічнае асвятленне дзеля эканоміі на фоне «дзіркі» ў бюджэце

• 14.06.2026, 23:13

Праблемы Іркуцкай вобласці адлюстроўваюць агульнарасійскую тэндэнцыю.

Улады Іркуцкай вобласці вырашылі адмовіцца ад вулічнага асвятлення ў шэрагу месцаў дзеля эканоміі бюджэту, «дзірка» ў якім па выніках 2025 года склала 46,4 млрд рублёў. Так, святло пачалі адключаць у паркавых і пешаходных зонах Брацка — другога па велічыні горада рэгіёна з насельніцтвам больш за 200 тыс. чалавек, перадае The Moscow Times.

У мясцовай адміністрацыі заявілі, што праводзяць «меры па энергазберажэнні», зацверджаныя рабочай групай «па аптымізацыі бюджэтных выдаткаў». Адказ чыноўнікаў апублікаваў дэпутат гардумы Андрэй Антоненкаў, якому жыхары паскардзіліся на знікненне вулічнага асвятлення ў парку мікрараёна 5а і ў цэнтры Брацка, уключаючы вуліцу Крупскай. «Святла няма, бо горад перайшоў у рэжым татальнай эканоміі сродкаў», — канстатаваў ён.

Раней пра тое ж пісаў калега Антоненкава Максім Ігнатаў, паведамляючы пра ўвядзенне мараторыя на выкананне дэпутацкіх наказаў у Брацку з-за недахопу бюджэтных сродкаў. Першапачаткова на кожны з 25 выбарчых акругаў планавалася выдзеліць па 3 млн рублёў на мясцовыя праекты. Замест гэтага грошы накіруюць на ўтрыманне дарожнай службы і грамадскага транспарту.

Ігнатаў адзначаў, што «гарызонт планавання выдаткаў сёння складае не больш за месяц», паколькі бюджэт Брацка «глыбока датацыйны» і «поўнасцю залежыць ад абласных уліванняў».

Па выніках 2025 года выдаткі бюджэту Іркуцкай вобласці склалі 318,1 млрд рублёў, а даходы — 271,7 млрд. Канчатковы дэфіцыт перавысіў планавы паказчык у 25,3 млрд рублёў амаль у два разы і дасягнуў 46,4 млрд. Пры гэтым бюджэт на 2026 год прадугледжвае скарачэнне выдаткаў да 303,1 млрд рублёў. Дэфіцыт пры гэтым прагназуецца на ўзроўні 24,8 млрд рублёў.

Праблемы Іркуцкай вобласці адлюстроўваюць агульнарасійскую тэндэнцыю. Паводле дадзеных Мінфіна, сукупны дэфіцыт бюджэтаў рэгіёнаў у 2025 годзе дасягнуў рэкордных 1,5 трлн рублёў. У параўнанні з мінулым годам «дзірка» павялічылася ў 5 разоў, адносна 2023 года — амаль у 8 разоў, а яе канчатковы памер стаў беспрэцэдэнтным за 20 гадоў даступнай статыстыкі.

Тым часам кіраўнік Мінфіна Антон Сілуанаў прагназуе, што па выніках 2026 года сумарны аб’ём дэфіцыту рэгіянальных бюджэтаў зноў павялічыцца і складзе 1,9 трлн рублёў.