Беларуска сустрэла самага выхаванага лася ў краіне

• 15.06.2026, 0:59

Відэафакт.

У нядзелю, 14 чэрвеня, беларуска ехала па трасе ў бок Мінска, калі ўбачыла лася. На шчасце, гэтая сустрэча не была ні небяспечнай, ні нават страшнай, перадае «Зеркало».

Карыстальніца Threads з нікам @krasnaya.presnya.belarus выклала відэа пра сустрэчу з дзікай жывёлай, якая прыемна яе здзівіла:

— Сённяшні ранак па дарозе ў Мінск пачаўся незвычайна. Еду сабе спакойна ў бок сталіцы, у раёне Смалявічаў. І тут — карціна! На дарозе стаіць лось. Але не просты, а з высокім IQ. Замест класічнага «нечакана выскачыць з кустоў» ён цярпліва чакаў, пакуль машыны спыняцца. Пераканаўся, што яго прапускаюць, і спакойна, з пачуццём уласнай годнасці перайшоў дарогу. Красавец, учынак варты павагі! Брава за ПДР. Усім бы такую свядомасць.

У каментары, які набраў найбольш лайкаў, было напісана: «Гэта проста беларускі лось, я не здзівлюся, калі б быў пешаходны пераход, ён бы па ім пераходзіў дарогу».